Robredo napalgan; gidala na sa Naga City, gihaya

MANILA – Gihaya na sa Naga City si Interior and Local Government Secretary Jesse Robredo kagahapon human makuha ug mahaw-as gikan sa abyon nga naunlod kagahapon sa
buntag.

Apan ang duha ka mga piloto wa pa maugkat gikan sa nagusbat nga bahin sa abyon kay gisuspenso una ang retrieval operation human maaksidente ang usa ka langyaw nga volunteer diver.

Ang iyang haya gikuyogan ni Presidente Benigno Aquino III gikan sa Masbate ug niabot sa Naga Airport mga alas 12:45 sa udto.

Ang pamilyang Robredo niawhag sa publiko sa paghatag kanila og kahigayunan nga magbangutan sa kamatayon sa Cabinet official.

Si Robredo napalgan mga 800 metros gikan sa baybayon sa Masbate City sa gilawmon nga mga 180 ka tiil, tulo ka adlaw human mahagsa ang abyon.

Human mapahibawo nga napalgan na ang lawas ni Robredo, nilarga dayon si Aquino balik sa Masbate ug niabot sa Masbate airport nianang udto.

Ang lungon nga metal nga gisudlan sa lawas ni Robredo gibalhin ngadto sa C-130 nga nidala kang Aquino sa Masbate.

Niadtong Lunes, si Aquino nga nangunay sa pagpangulo sa rescue operations sukad pa niadtong Dominggo niuli sa Manila niadtong Lunes aron pagsaulog sa death anniversary sa iyang amahan nga si kanhi Senador Benigno Simeon “Ninoy” Aquino Jr. kagahapon.

Kagahapon, napalgan ang mga lawas nila ni Robredo ug mga piloto nga sila si Captain Jessup Bahinting ug Nepalese co-pilot Kshitiz Chand.

Apan ang mga lawas nila ni Bahinting ug Chand wa pa maugkat kay nahimutang kini sa dung sa abyon nga nagusbat.

Gikinahanglan nga hinayhinayon ang pagkuha niini aron di mahiadto sa mas lawom nga bahin sa dagat ang abyon.

Ang emotional nga si Transportation and Communications Secretary Manuel Roxas, kinsa nagdumala sa search and rescue operations, nikompirmar sa pagkakuha sa lawas sa kalihim.

Iyang gipahibawo si Aquino nga napalgan na ang lawas mga alas 8:20 sa buntag.

“He sought absolute confirmation and when it was confirmed, he was just quite,” matod ni Roxas.

Matod niya sa usa ka press conference nga mga alas 7:25 sa buntag ang divers nakapag sa fuselage sa abyon nga six-seater nga Piper Senaca nga dunay sulod nga tulo ka mga lawas. (Sunnex)