Award gihatag sa pagluwas sa iring sa sunog sa Mabolo

GIPASIDUNGGAN sa Humane Society International (HSI) ang lima ka mga bombero sa Cebu City Fire Department gumikan sa ilang pagluwas sa usa ka iring atol sa sunog niadtong Hunyo.

Sila SFO1 Gilberto Solon, SFO1 Fernando Rota, FO3 Stephen Prieto, FO3 Noel Miñoza ug FO3 Ramiro Nabua nakadawat og citation gikan sa Hsi gumikan sa ilang bayanihong buhat pagluwas sa usa ka hayop nga na trap sa sunog sa sityo Panagdait, barangay Mabolo.

Silang Dr. Alice Utlang, hepe sa Department of Veterinary Medicine and Fisheries (DVMF)ug Dr. Rey Napoles, Philippine representative sa HSI maoy nitunol sa citation award ngadto sa lima ka mga firefighter.

Gipahalipayan sab sa Hsi si Dr. Jessica Maribojoc, tagdumala sa city pound, og Humane Ve­terinarian in Government service.

Si Maribojoc gihatagan sab og kahigayunan sa Hsi nga makatambong sa Animal Care Expo sa Mayo, 2013 didto sa Estados Unidos.

Gipadayag usab ni Utlang nga nakadawat ang Dvmf og 10 ka microchip ug usa ka reader nga maoy ibutang sa tangkugo sa mga iro aron dali kining mailhan ug mamenosan na ang saag nga mga iro nga way tag-iya nga mangangkon.