Ig-agaw sa bise mayor sa Carcar dakpan sa mga pulis

GIKATAHAPANG bigtime drug pusher sa dakbayan sa Carcar nadakpan sa kapulisan ug na­kuha’ag daghang shabu, drug paraphernalia ug armas human gironda ang iyang balay niadtong Martes sa alas 9:30 sa gabii sa may Barangay Poblacion 2.

Si Erwin Barcenas, 45, alias “Tatay Erwin,” minyo, kanhi seaman ug ig-agaw ni Bise Mayor Patrick Barcenas sa dakbayan sa Carcar, nasikop nila ni Chief Insp. Teodolfo Manatad lll, hepe sa Carcar Police ug mga kauban pinasikad sa search warrant nga giisyu ni Judge Soliver Peras sa Regional Trial Court (TRC-10).

Si Barcenas nakuhaag 18 ka gagmay nga mga pakite sa shabu, duha ka medium-sized nga pakite, .22 Magnum Black Widow nga armas uban sa upat ka mga bala, duha ka mga stick sa marijuana, cash nga P1,100 nga gituohang halin mga cell phone card, drug paraphernalia ug uban pa.

Si Manatad nga nahinabi sa Sun.Star Superbalita nagkanayon nga si Barcenas nabutang sa level 2 sa ilang listahan sa mga drug personality tungod sa kalapad sa operasyon sa ginadiling drugas.

Matod niya nga dugay na nilang gi-monitor si Barcenas, apan tungod sa kalisod ug kasudlonon sa balay niini nadugay sila sa pagpatuman sa search warrant.

Ang pagparonda gisaksihan mismo ni Kapitan Chad Rojo. Hinuon si Barcenas wa mosukol sa mga pulis ug malinawon nga nitahan sa kaugalingon.

Gibutyag ni Manatad nga si Barcenas on bail usab karon tungod sa iyang kasong illegal drugs human nadakpan sa miaging mga tuig.

Giklaro niya nga kaniadto pang di pa siya hepe sa Carcar, si Barcenas naila na kaayo sa pagpayuhot sa illegal nga drugas hinungdan nga daghang mga reklamo sa mga silingan niini.

Tungod sa pagkasikop ni Barcenas, ilang gilauman nga maminos-minosan ang illegal nga drugas sa dapit.

Hinuon nagpadayon sila sa ilang kampanya sa pagpanakop niadtong mga nalambigit niini.