Lawas ni Bahinting naugkat na

NAKUHA na sa mga diver ang lawas ni Captain Jessup Bahinting niadtong Miyerkules gikan sa nahagsang abyon nga Piper Seneca niadtong Sabado sa hapon sa Masbate ug nakapatay kang Local Government Secretary Jesse Robredo.

“Fuselage lifted to and hanging by rope at shallower level where scuba divers cud (could) work on it. One more body recovered,” matod ni Transportation Secretary Mar Roxas sa sayo pa sa iyang Twitter account.

Si Orson Bahinting, iguson ni Jessup, nikompirmar nga ang lawas nga nakuha iya sa iyang igsuon.

Ang lawas ni Captain Captain Bahinting giila pinaagi sa iyang sapot ug relo nga gisul-ob.

Ang fuselage sa abyon, diin ang lawas napalgan, giugkta mga alas 5:30 na sa hapon kagahapon.

Wa pa mapalgi ang lawas sa co-pilot nga si Kshitiz Chand, usa ka Nepalese.

Ang lawas ni Bahinting toa na sa usa ka punerarya sa dakbayan sa Masbate.

AMAZING GRACE

Bisan niadtong buhi pa si Bahinting, nagkasultihanay na diay sila sa iyang asawa nga si Margarita unsaon sa paghipos ang ilang mga lawas kon sila mangamatay.

Usa sa mga gusto ni Bahinting nga itugtog panahon sa iyang lubong mao ang inila kaayong awit nga relihiyuso nga “Amazing Grace.”

Sa buhi pa si Captain Bahinting nahisgutan na sa ilang pamilya kon unsaon paghipos ang ilang mga patayng lawas sa iyang asawa.

Ang kamanghuran nga anak babaye maoy gitahasan nga moatiman ug mohipos sa mga patayng lawas sa ilang mga ginikanan.

Si Margarita niasoy nga di gusto nga magpa cremate ang iyang bana ug ilang nasabutan nga itupad unya ang ilang mga lubong.

ASA HAYAON

Gipahibawo ni Margarita nga kon madala na ang lawas sa iyang bana dinhi sa Sugbo, hayaon kini og tulo ka mga adlaw sa St. Peter Memorial Homes sa Imus St. sa dakbayan
sa Sugbo ug di na dad-on sa ilang balay sa Barangay San Isidro sa dakbayan sa Talisay.

Adto na unya ideretso ang lawas sa lungsod sa Ginatilan aron adto didto ilubong.

Wa say plano ang mga nagbangutan nga banay ni kapitan Bahinting nga sila maoy
mopadayon sa negusyo sa eroplano tungod kay ang asawa di piloto ug wa silay kalibutan sa pagduma niini.

Ang mga anak gusto na lang sab nga adto sa gawas sa nasod manimpalad kay toa na man kini didto ug ang ilang mga pamilya.

Nagpasalamat sab si Margarita sa tanan nga kahigalaan,mga paryente ug mga kaila nga miduyog sa ilang kasub-anan .

PASIDUNGOG

Subay niini, ang konseho sa dakbayan sa Talisay gitakda nga mopalabang og resulosyon nga magpasidungog sa kabayanihon nga buhat ni Captain Bahinting.

Ang kapitan maoy gitumbok nga nakatabang sa pagkuha sa anti venom nga gi-injection sa napaakan og cobra nga si Ronaldo Aventurado sa Cebu zoo.

Bisan siya didto sa Manila, iyang gimandoan ang usa sa iyang mga piloto sa pag-adto sa Camiguin aron kuhaon ang upat ka anti-venom vials nga idapat kang Cebu City Zoo keeper Ronaldo Aventurado.

Tungod sa iyang gibuhat, naluwas si Aventurado ug nakagawas na kagahapon gikan sa Cebu City Medical Center.

Iyang giisip si Bahinting nga maoy nakaluwas sa iyang kinabuhi human siya mapaaki sa Philippine king cobra sa miaging semana sa may gate sa zoo. (SUNNEX)