Reklamo batok sa duha ka empleyado gibasura

NAKALINGKAWAS ang duha ka mga empleyado sa kagamhanan sa dak­bayan sa Sugbo human gibasura sa Office of the Omubudsman-Visayas ang reklamo nga gipasaka batok kanila nga giingong nagpabaya sila sa ilang mga gimbuhaton.

Ang Ombudsman nibasura sa kasong administratiba nga neglect of duty batok nilang Nanette Solon ug ang namatay nang si Christopher Ong nga pulos nadestino sa tax mapping unit ubos sa City Treasurer’s Office.

Nalatid sa ilang resolusyon nga a­ngayan lang nga ibasura ang reklamo kay kuwang kini sa ebidensya.

Ang reklamante nga si Veronica Kong nipasangil nilang Solon ug Ong nga nagpabaya sa ilang gimbuhaton dihang napakyas sila sa pagpasira sa pipila ka mga establisemento nga nag-operate pero way mga business permit.

Si Kong nanag-iya og building sa may M.J. Cuenco Ave. ug sa Lorega, dakbayan sa Sugbo.

Niadtong Oktubre 2005, si Kong ug ang iyang anak ni-adto sa City Hall ug nangutana kon
ang kan-anan ug KTV bar nga anaa sa ilang building duna bay permiso nga maka-operate.

Ang City Treasurer’s Office nibutyag nga ang duha ka establisemento wa maisyuhi og mga business permit.

Matod ni Kong nga giawhag niya silang Solon ug Ong nga mobisita sa establisemento apan dihang nanawag kon unsay kalambuan giingong nihatag nig di makiangayong rason sa wa paghimo sa iyang hangyo.

Sa iyang bahin, si Solon namahayag sa iyang counter-affidavit nga naghimakak nga nagpabaya siya sa iyang trabaho.

Matod niya nga gipahibawo siya niadtong 2005 nga si Kong nitawag sa City Treasurer’s Office nga nagtaho nga ang igsuon niining lalake nga may negusyo kini sa gipanag-iyang kabtangan sa ilang mga ginikanan nga way permit.

Ang reklamo ni Kong gi-refer ngadto sa tax mapping alang sa mga business establishment. Gitahasan ni Solon si Ong nga mosusi sa videoke bar sa igsuon ni Kong.

Ang City Hall nipadalag notice kang Gregorio Santos, igsuon ni Kong, nga nagmando nga motuman sa gikinahanglang rekisitos alang sa iyang negusyo.

Nakompleto ni Santos ang iyang pagkuha sa rekisitos niadtong Hul­yo 11, 2005 apan si Kong padayon na­nawag kang Solon nganong wa sirad-I ang KTV bar sa iyang igsuon.

Nitataw si Solon nga ang mayor lang makasira sa establisemento nga nag-operate nga way permit.