Abogado nga `namabaye’ gisuspenso

NIAY pahimangno niadtong mga abogado nga mamabaye.

Ang Korte Suprema nisuspenso sa usa ka abogado sa pagpangabogado og usa ka tuig tungod sa paglapas sa mga probisyon sa Code of Professional Responsibility.

Napalgan sa Korte Suprema si manlalaban Mariano R. Pefianco nga sad-an sa paglapas sa Code provision nga nagdili sa usa ka abogado nga mohimo og dishonest, immoral o manglimbong nga buhat.

Si Pefianco gikatahong nibiya sa iyang legal nga asawa ug nakigpuyo sa laing babaye, kinsa duna silay upat ka mga anak.

Duna silay duha ka mga anak sa legal nga asawa.

“The practice of law is considered a privilege bestowed by the State on those who show that they possess and continue to possess the legal qualifications for the profession,” matod sa resolution ni Associate Justice Estela Perlas Bernabe nga gisuwat alang sa Third Division sa Korte Suprema.

Ang kaso nagagumikan sa kasong administratiba alang sa disbarment nga gipasaka sa usa ka Gilbert Tumbokon, usa ka engineer, batok kang Pefianco sa High Court.

Si Pefianco nagrepresentar sa mga sumusunod sa tag-iya sa usa ka yuta nga dunay estate proceedings sa lower court sa lalawigan sa Aklan.

Gikiha ang abogado og grave dishonesty, gross misconduct constituting deceit ug grossly immoral conduct.

Ang reklamante nagkanayon nga si Pefianco niuyon nga hatagan siya og 20 porsyento nga madawat sa abogado gikan sa iyang kliyente.

Ang commission gius-us ngadto sa 10 porsyento.

Apan dihang si Pefianco nakadawat sa 17 porsyento nga attorney’s fees gikan sa balor sa yuta nga niabot og P40 milyunes ang kinatibuk-an, ang abogado wa mohatag kaniya sa iyang komisyon.

Nipasangil ang reklamante nga wa magpuyo sa kinabuhing moral ang abogado nga gikinahanglan sa iyang propesyon dihang iyang gibiyaan ang iyang legal nga asawa.

Apan si Pefianco, sa iyang pagtubag sa kaso, niawhag nga i-dismiss ang kaso kay way basihanan.GMD sa Sun.Star Cebu