‘Lider’ sa tulisan napusilan, kritikal

KRITIKAL ang kahimtang sa giingong lider sa mga tulisan human napusilan sa hepe sa police dihang siya nangilog sa M16 Rifle samtang gidala sa police station.

Kini human siya masikop kagahapon sa alas 3:30 sa kadlawon sa Barangay Ilihan, lungsod sa Tabogon.

Si Brian Garcia, 22, ulitawo, taga Barangay Libjo, lungsod sa Tabogon, samdan sa iyang abaga ug tiyan dihang daling gidala sa Severo Verallo Hospital sa dakbayan sa Bogo, apan tungod sa kagrabi sa kahimtang gibalhin sa usa ka ospital sa dakbayan sa Sugbo.

Si Insp. Lamberto Hibaya, hepe sa Tabogon Police, maoy nakapusil kang Garcia samtang gidala sa police station human nadakpan.

Si Garcia gilambigit sa pagpanulis sa Ceres Bus (GSJ-426) niadtong Sabado, Agusto 25, sa alas 3:30 sa kadlawon sa Barangay Libjo.

Si Hibaya nga nahinabi sa Sun.Star Superbalita nagkanayon nga ilang nasikop si Garcia sa balay niini.

Ila kining nakuhaag usa ka paltik nga .38 caliber snubnose revolver uban sa lima ka mga bala, uniporme sa police ug shorts.

Apan dihang nagpadulong na sila sa police station, wa nila mabantayi nga nakatangtang kini sa posas bisan paman kon gibinaklid.

Kalit lang kining niambak sa patrol car ug miilog sa M16-armalite nga gidala ni PO3 Alman Acabal, kinsa mikupot niini hinungdan nga aron ma-neutralize gipusil niya.

Matod ni Hibaya, una mi-warning shot siya ginamit ang iyang 9mm pistol.

Giingong wa gihapon mipatuo si Garcia nga nakiglayugay kang PO3 Acabal aron ilugon ang M16 armalite rifle hinungdan iyang gipusil sa tiyan.

Apan bisan paman kon samaran sa tiyan, nipadayon gihapon kini sa pag-ilog sa armalite rifle.

Dihang iyang nakita nga namiligro, iyang gipusil sa iyang kalibre .45 diha sa abaga nga maoy nakapakalma niini.

Giklaro niya nga maayo nila pagkataud ang pusas sa mga kamot ni Garcia nga nagbinaklid.

Apan nagtuo sila nga duna kiniy yawe hinungdan sa pag-abot sa may Barangay Ilihan, diin sila nakahunong, kini miambak.

“Naa siyay intention sa pag-eskapo gyud niadtong higayuna. Nangilog pa siya sa armas. Ako hinuong na-neutralized. Giseguro gyud nako kay dilikado sab ni siyang pagkatawo. Nakapatay na kaniadto,” dugang ni Hibaya.

Gibutyag niini nga dunay kasong pagpatay si Garcia sa ilang lungsod, gawas sa mga kaso niining pagpanulis.

Gani kini maoy lider sa mga tulisan samtang ang mga kauban niini mga batan-on sab.

Hinungdan nga dihang ilang gitulis ang Ceres bus, nakakuha gilayon sila og background niini.

Apan tungod sa pagka-idlas, dugay nilang nadakpan.

Ikatulo na kahigayon nga ilang gihupohupoan si Garcia, apan di matulog sa ilang balay.

Natayming lang kagahapong adlawa nga nipauli sanglit sa ilang nahibaw-an adto ra sa lasang matulog.

Mitukma sab ang pamahayag sa conductor nga nibutyag nga ang usa sa mga tulisan nag-unipormi og pulis nga upper shirt ingon man nag-short pants sa pulis.

Ang maong ibedensiya nakuha sa balay niini ingon man ang cellphone sa usa ka estudyante nga biktima nga nalakip sa gitulis.

Kahinumduman nga si Garcia usa sa upat ka mga tawo nga ningtulis sa Ceres Bus diin nadala nila ang P7,000 sa conductor ug mga pasahero, samtang nagbiyahi gikan sa Hagnaya, San Remegio paingon sa dakbayan sa Sugbo.