Karaang merkado publiko nagubot sa paghawan

NITUMAW ang kagu­bot sa karaang merkado publiko sa dakbayan sa Mandaue sa dihang ang mga sakop sa anti-squatting team gikan sa City Legal Office nanglimpyo sa mga sidewalk vendor sa may dalan B. Ceniza sa Barangay Centro niadtong Martes sa gabii.

Si retired Major Edmundo Maboloc, pangulo sa anti-squatting team, nibutyag nga napugos siya sa pagpabuto sa iyang armas aron lang mahunong ang kagubot.

Iyang gibutyag nga di mominus 50 ka mga tawo apil na ang mga bystander ning-apil sa commotion nga niresulta sa pagka­wala sa iyang bulawang pulseras ug eyeglasses.

Si City Legal lawyer Giovanni Tianero nibut­yag nga nakadawat silag report nga adunay mga manindahay og isda nga mamaligya sa lugar sa hapon ug sa kaadlawon apan sa dihang badlungon sa mga sakop sa Traffic Enforcement Agency in Mandaue (Team) sanglit nakabara sa karsada, di mopatuo.

Gani ang uban niini adunay mga stall sa merkado publiko apan padayon gihapon silang mamaligya sa maong lugar.

Si Maboloc niingon nga ang ilang grupo nanghawan sa mga lugar sa Mandaue di lang diha sa may dalan B. Ceniza.

Apan sa dihang niabot sila sa lugar ilang nasakpan sa akto nga diha na ang mga manindahay sa karsada.

Sa dihang gisakay ang mga sudlanan sa isda, nagsugod ang kagubot sa dihang nisaka ang mga manindahay sa ilang sakyanan ug gipugos pagkuha ang ilang mga isda samtang ang uban niini gibutang sa atubangan sa ilang sakyanan.