Nanghingi gipatay

LALAKENG giingong tulisan ug kawatan namatay human giulo pagpusil sa duha ka wa mailhing mga tawo nagsakay sa motorsiklo human siya nanghingi og buwad sa Taboan Public Market kagahapon sa ala 1:50 sa hapon sa may Lakandula street, corner Tres de Abril, Barangay San Nicolas dakbayan sa Sugbo.

Si Jake Michael Fabricante, 23, dunay ka live-in, taga Barangay Sawang Calero, giilang bangiitang tulisan, snatcher ug nagbalikbalik pagkapriso, namatay human nakaangkon og samad sa ulo nga nilapos ang bala sa apapangig.

Samtang ang nipusil niini duha ka mga lalake nga nagsakay sa kolor puti nga XRM nga motorsiklo nga pulos nagsul-ob sa kolor puti nga helmet.

Si SPO1 Ruth Violango, imbestigador sa Homicide Section sa Cebu City Police nga nahinabi sa Sun.Star Superbalita, niingon nga ang biktima gikan pang naghingi og buwad nga nukos sa mga tindahan sa may Taboan.

Sa paglakaw niini diha sa may tunga sa dalan, kalit lang nibutho ang duha ka mga tawo ug gipusil ang biktima sa ulo ginamit ang kalibre .45 nga pistola.

Kini base sa usa ka kabhang sa bala nga nakuha sa crime scene.

Ang mga pulis maoy nidala kaniya sa Cebu City Medical Center, diin didto sa emergency room nakuha sa iyang sa bulsa sa iyang shorts ang re­plica sa usa ka armas nga lighter diay.

Matod ni Violango nga wa nila isalikway ang posibilidad nga dunay daghang nangasuko sa biktima tungod sa iyang pagka-notadong badlungon sa ilang dapit.