Tom nagtuong Ombud duna gyuy dapigan

WA maglaum si Kongresista Tomas Osmeña og paborabling resulta sa imbestigasyon sa Ombudsman sa gisang-at nga reklamo ni Mayor Michael Rama gumikan sa giingong illegal nga paggamit sa magbabalaud sa duha ka mga awtong Dodge Charger.

Si Osmeña sa interview sa sibyaanang dyLA niingon nga nangita lang og sayop si Rama ug nagsalig kang Konsehal Edgardo Labella, kinsa iyang runningmate kay adunay impluwensiya sa buhatan sa Ombudsman.

“Makasalig si Mike Rama kang Labella (Edgar) kay suod kaayo si Labella sa Ombudsman. Mao na akong tan-aw, mao na akong gi suspect. Tubag si Labella nga I did not know anything about it. Mao na gaduda gyud ko,” padayag ni Osmeña.

Si Labella nahimong director sa Ombudsman Visayas sa wa pa mosulod sa pulitika sa dakbayan sa Sugbo.

Nagtuo ang kanhi ma­yor nga ang pagpapangayo ni Rama og dinaliang im­bestigasyon sa Ombudsman gumikan sa giingong mga kalapasan niya usa ka “political harassment” sa­nglit ang Ombudsman way hurisdiksyon kanilang mga magbabalaud.

Apan bisan pa man niini, iyang gihangop ang imbestigasyon ug andam siya sa pagtubag sa mga pasangil.

Uban kang Osmeña nga ipaimbestigar mao ang iyang igsuong babaye nga si Minnie ug pag-umangkong si Paolo diin nakarehistro sa ilang mga ngan ang duha ka mga awto.