Aboitiz mi-turn over sa weather instruments

MAS makapangandam na unya ang lokal nga mga kagamhanan sa pag-usab-usab sa panahon nga sagad hinungdan sa mga katalagman sama sa baha ug pagdahili sa yuta.

Kini human gidonar ang 2.9 milyunes dolyares nga balor sa automated weather station (AWS) kagahapong adlawa sa Aboitiz Group of Companies, Weather Philippines Foundation ug Meteomedia.

Mga dakbayan sa Sugbo, Talisay, Toledo, Mandaue, Lapu-Lapu ug Danao ang nakadawat sa mao nga ekipo.

Lakip usab sa nanambong ug ningdawat sa maong kahimanan ang mga representante sa kagamhanan sa Tagbilaran, Bohol; Tacloban, Maasin, ug Ormoc sa Leyte; Calbayog sa Samar ug Dumaguete City, Negros Oriental.

Si Celso Caballero III, general manager sa Wea­ther Philippines Foundation, nibutyag nga ang ilang proyekto di aron makigkompetensya sa Phi­lippine Atmospheric,
Geophysical, Astronomical Services Administration (Pag-asa).

Kini kaabag hinuon sa Pagasa alang sa mas maa­yong weather forecasting aron mas makapangandam ang local government units ug uban pang mga ahensya sa kagamhanan.

Ang AWS mahimong maka-forecast kon unsa ang masinating panahon sa mosunod nga pito ka mga adlaw.  

Gitug-an ni Caballero nga ang gobyerno mao lang ang moamping ug momentenar sa maong ekipo.

Apan sila gihapon ang mogasto sa P50,000 nga annual maintenance niini.

Gipanglantawan nga molungtad ang ekipo og lima ngadto sa napu ka mga tuig kon maayo lang ang pagkaatiman.