Gullas miluwat na isip Trustee sa CIS

NILUWAT isip chairperson sa Board of Trustees sa Cebu International School si Jacqueline Gullas Weckman, inahan sa usa sa mga bata nga namatay atol sa field trip didto sa Subic niadtong Septiyembre 12, 2012.

Samtang ang board of trustees sa tunghaan nag-umol na ang investigating panel nga maoy mosusi sa mga detalye kon nganong nahitabo ang pagkalumos nila ni Jae Hak “James” Jun, usa ka Korean national, ug Kyle Julian Gullas Weckman, anak ni Jacqueline ug apo ni kanhi kongresista Jose “Dodong” Gullas.

Si Mariano “Mimo” Osmeña, corporate secretary sa board of trustees, maoy nangulo sa maong panel nga gilangkuban sa mga miyembro sama sa usa ka abogado, representante sa Korean community sa CIS, representante sa Parents and Teachers Association ug dean sa Student Services.

Iyang gikompirmar ang pag-resign ni Weckman sa board sa miaging gabii gumikan sa conflict of interest gumikan kay ang anak niini usa man sa mga nahilambigit sa trahedya.

“Basin conflict of interest kay iya man gud anak,” asoy ni Osmeña dihang nahinabi sa sibyaanang dyLA kagahapon.

Sa samang interview, wa ni mohatag og detalye sa dagan sa imbestigasyon apan, matod niya, kadaghan sa mga impormasyon nga ilang gikinahanglan anaa na nila ug ila iduso ang resulta ngadto sa board karong Sabado.

Lakip sa gipang-interview ang mga tawo nga diha sa dapit dihang nahitabo ang aksidente ug ang mga bata nga nikuyog sa field trip apil na ang anak ni Osmeña.

Tungod sa pag-resign ni Weckman ang vice chairman sa board nga si Xavier Aboitiz ang ni-take over sa gibiyaan nga puwesto.

Samtang ang rehiyonal nga buhatan sa Department of Education wala pa makasugod sa fact-finding investigation tungod kay wala pa madawat niini ang kamanduan gikan ni Secretary Armin Luistro.

Ang central office maoy momando sa imbestigasyon sanglit usa ka international school ang CIS ug ang tanang mga permit niini adto direkta nga iduso sa ulohang buhatan sa DepEd.

Tinguha sa pamilyang Gullas nga mapugngan ang paglarga gawas sa nasod sa usa ka magtutudlo sa CIS nga maoy ni-supervise sa field trip didto sa Bataan.

Giingon nga plano sa mga Gullas nga mopasaka og kasong homicide through reckless imprudence batok sa maong magtutudlo.

Si Nelson Gallantes, head supervisor sa Bureau of Immigration sa Mactan Cebu International Air­port, nagkanayon nga sukad nila nadawat ang giluwatan nga “lookout bulletin” ni Justice Secretary Leila de Lima, way tawo nga dunay susamang pangan ang nigawas sa Sugbo paingon sa ubang nasod agi sa maong tugpahanan.