Opisyal na nga kandidato
-A A +AThursday, September 20, 2012
OPISYAL na nga gituboy sa Liberal party si Atty. Hilario Junjun Davide III isip kandidato pagka gobernador sa lalawigan sa Sugbo sa umaabot nga piliay sunod tuig.
Si Davide nikompirmar nga nadawat na niya ang certificate of nomination and acceptance isip gubernatorial candidate sa partido niadtong Lunes atol sa iyang pag-adto sa LP headquarter.
Isip LP Cebu provincial chairman, iya na usab nadawat ang authority to nominate and issue certificates of nomination diin magagikan niya ang nominasyon alang sa mga kandidato sa pagka bise gobernador, provincial board members, municipal mayors, vice mayors ug municipal councilors sa 2013 election.
Ang certificates of nomination alang sa mga kandidato sa pagka kongresista ug city mayors ang magagikan sa LP national headquarter, matod ni Davide dihang nahinabi sa mga tigbalita.
Iyang gipaneguro nga sa Septiyembre 28 makumpleto na ang line-up sa mga kandidato sa LP sa nagkadaiyang mga lungsod ug siyudad sa lalawigan.
Iyang gitahasan ang iyang executive assistant nga si Atty. Ramil Abing nga pangtawgan ang mga mayor ug ubang posible nga mga kandidato aron masugdan na ang selection process.
Si Davide niangkon nga duna pay mga lugar sa probinsya sa Sugbo nga wa pa silay posible nga mga kandidato.
Apan iyang gipaneguro nga duna sila igong ikasakbang sa mga kandidato sa One Cebu nga gipamunuan ni Gobernador Gwen Garcia.
Gipatik sa mantalaang SuperBalita Cebu Septembre 21, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
