Di ko moatras: Labella; `Totol’ gihangop

DESIDISO ug determinado nga magpapili si Konsehal Edgardo Labella pagka bise mayor sa dakbayan sa Sugbo sukwahi sa pangagpas sa ilang  mga kaatbang sa pulitika nga siya mosibog.

Usa ka kasaligang tinubdan sa Sun.Star Superbalita gikan sa kampo sa Bando Osmena Pundok Kauswagan (BOPK) niingon nga napanglantawan nila nga moatras ra gihapon si Labella, sama sa gibuhat ni kanhi Kong. Antonio Cuenco.

Si Cuenco nga mao untay kandidato sa Team Rama sa pagka kongresista sa south district niatras sa iyang kandidatura tungod sa suliran sa panglawas.

Si Labella, sa iyang bahin, natingala kon diin gikan ang maong tabi-tabi nga mosunod siya sa desisyon ni Cuenco nga di na magpapili sa south district.

“What has it to do? It did not come from me. From whom it did come from?,” matod pa ni Labella kinsa mao ang number one councilor sa north district.

Dugang pa sa konsehal kon gikan man gani ang maong taho ni Bise Mayor Joy Augustus Young, mosabot ra siya.

“Thats understandable and I don’t want to elaborate,” matod pa sa konsehal.

Si Labella kinsa anaa na usab sa iyang katapusang termino pagkakonsehal human sa tulo ka sunod sunod nga pagpapili gikan niadtong 2004 giingong maoy nakakuha sa mayoriya sa kinabag-an sa mga kapitan sa dakbayan kon itandi ni Young.

Si Mayor Michael Rama sa iyang bahin pwerting bahakhak sa maong taho nga nihulagway sa iyang grupo nga “move, move, move” ug wa nay makapugong kanila.

Samtang gihangop og maayo sa Team Rama si manlalaban Aristotle Batuhan nga mao na karon ang ilang kandidato hulip kang Cuenco.

Gihangop sa mga sakop sa Team Rama ang pagtapon ni Batuhan sa ilang grupo isip kandidato pagka kongresista sa Cebu City south district alang sa 2013 elections.

Si Rama nalipay sa presensya ni Batuhan kinsa iyang gihulagway nga “adopted son” sa ilang grupo human niretiro si Cuenco sa pulitika.

Si Rama niingon nga haom gyud kaayo si Batuhan sa maong posisyon.

Samtang si Labella nihulagway kang Batuhan nga usa usab kang maayong abogado sama kang Cuenco busa haom kaayo sa papel sa pagka magbabalaod.

Si Konsehal Joey Daluz kinsa magpabalin isip general campaign manger sa Team Rama nisaad sa mas hugot ug subsob nga kampanya aron modaog sa piniliay.

“We assure him that we will work hard to campaign, nga the Team Rama will win from the mayor to to Congress and to the last councilor. He’s really a competent candidate for congress unlike the other one (Rodrigo Abellanosa),” padayag ni Daluz dala ang pika ngadto kang Abellanosa.

Ang campaign manager ug last termer nga konsehal nga si Eduardo Rama adunay samang baruganan ni Daluz ug nihulagway kang Batuhan nga pareha sila og tumong sa kaayuhan sa katawhan.

“We would like to welcome Atty. Batuhan to our group and brings with him his advocacies the same with our advocies in Team Rama… We will campaign hard.” padayag ni Rama.

Si kapitan George Rama nga gihulagway sa mayor nga “big boss” sa ilang grupo dugay nang nihangop kang Batuhan ug angay pilion sa katawhan gumikan sa iyang kaseryoso moserbisyo sa iyang mga molupyo sa distrito.