2 gipamusil-patay sa dakbayan

DUHA ang gipamusil-patay sa managlahing dapit sa dakbayan sa Sugbo niadtong Sabado.

Sa 2:30 sa hapon, si Danilo Flores, 52, gipusil sa Barangay Sto. Niño,

Sa imbestigasyon sa Homicide Section sa Cebu City Police Office (CCPO), si Flores nag­la­­kaw lang sa dalan dihang duha ka mga tawo nga nagsakay og motorsiklo nilabay sa biktima ug gipusil sa nag-angkas sa motor.

Naigo si Flores sa tuong dughan ug nilapos sa likod hinungdan sa iyang kamatayon.

Human sa hitabo, ang mamumuno daling nisibat, sumala sa kapulisan.

Si SPO4 Alex Dacua, Homicide Investigator, nagkanayon nga ila pang susihon ang motibo sa pagpamusil.

Sumala sa kapulisan, dunay mga saksi nga posible nga magtultol sa pagsikop sa mga suspek.

Sa laing bahin, alas 4:15 sa hapon, si Glendoren Entice, 28, gipusil sa Barangay Calamba.

Si Entice naglakaw lang usab uban sa iyang kapuyo padulong sa usa ka kan-anan duol sa dapit dihang gipusil sa mamumuno nga nagsakay og motorsiklo.

Gipusil og makadag­hang higayon ang biktima ug ang kapuyo niini nakapino sa pagdagan.
Si Entice naigo sa dughan, ulo ug ubang bahin sa lawas.

Gidali kini pagdala sa Cebu City Medical Center (CCMC) apan gideklarar nga dead on arrival (DO).

Unom ka mga kabhang sa kalibre .45 ang nakuha sa kapulisan sa dapit.

Ang kapulisan nagsusi pa ka­ron sa motibo sa pagpamusil. (Sun.Star Cebu)