Palma uyon kaayo

SAMA kang Cebu Arch­bishop Emeritus Ri­cardo Cardinal Vidal, su­­portado usab ni Arsobis­po Jose Palma ang ba­­­ruganan sa University of San Jose-Recoletos nga gitugtan ang babayeng tinun-an nga nalambi­git sa sex video scandal nga maka-gra­duwar.

“I just support the stand of the university.” padayag ni Palma dihang nahinabi sa mga tigbalita kagahapon sa buntag human sa iyang gisaulog nga misa sa World Day of the Sick sa Cebu Metropolitan Cathedral.

Matod niya nasayod ang tagdumala sa unibersidad sa unsay angay nga buhaton sa babayeng estudyante nga makita sa video.

Siya masaligon nga ang mga asosasyon nga gilangkuban sa nagkadaiyang Catholic schools makaumol og mga lagda nga malikayan ang susamang eskandalo.

Si Palma niingon nga taliwa sa bati nga nahitabo, ang komunidad kon mamalandong dunay makat-unan gikan sa maong eskandalo.

Si Vidal unang namahayag nga bisan sa nahimo sa dalagita, insakto lang ang gihimo sa kadagkuan sa unibersidad nga gitugtan siya nga makagraduwar kon makapasar sa tanang rekisitos nga gikinahanglan sa graduation.

“It does not mean they are tolerating but for the sake of the student who made a mistake, they have to do something,” matod sa 82-anyos nga retiradong arsobispo sa Sugbo.