Trabahante gipatay gituohan nga gitulis

USA ka trabahante ang namatay human nakaangkon og mga samad dinungga­ban sa
nagkadaiyang bahin sa iyang lawas.

Gituohang gitulis ang biktima kagahapon sa alas 3:00 sa kaadlawon sa Barangay Lipata, lungsod sa Minglanilla.

Si John Bernie Apor, 19, ulitawo, trabahente sa Nissin nagpuyo sa nahisgutang lugar, namatay paglabay sa pipila ka minutos dihang nadangat sa Minglanilla District Hospital.

Si PO1 Noel Mamale, desk officer sa Minglanilla police station nga nahinabi sa Sun.Star Superbalita, nagkanayon nga naglakaw ang biktima padulong mopauli gikan sa trabaho.

Apan kalit nga gidunggab sa wala mai­lhing mamumuno nga dali ra sab kaayong nahanaw sa ngitngit nga lugar.

Usa ka barangay tanod nga si Nelson Adlawan, maoy nidala sa biktima sa tambalanan.
Matod ni PO1 Mamale nga gituohan nila nga gitulis ang biktima sanglit nahanaw na ang gidala niini nga cellphone.

Gituohan sab sa pulis nga posibling nisukol ang biktima dihang gitulis hinungdan nga nadunggaban.