GAWAS sa isyu bahin sa pakigrelasyon sa iyang sekretarya, laing problema ang giatubang karon sa kontrobersyal nga Capitol chief security officer Loy Madrigal human nakabag-id ang iyang gisakyan sa magtiayong nagmotorsiklo sa Barangay Don Pedro Rodriguez, dakbayan sa Bogo niadtong Dominggo, alas 8:20 sa gabii, patay ang bana.
Si Felix Mirambel, 50, nagmaneho sa motorsiklo, ug niangkas ang iyang asawa nga si Marites, 43, taga Barangay Taytayan, lungsod sa San Remegio, pulos unang nalandig sa tambalanan sa Bogo, apan gibalhin sa Vicente Sotto Memorial Medical Center.
Si Felix namatay kagahapon sa 2:52 sa hapon sa VSMMC, sumala sa iyang pag-umangkon nga si Edgard Mirambel. Si PO3 Edwin Dignos sa traffic police sa Bogo nibutyag nga ang magtiayon mopauli na unta sa ilang balay gikan sa duty sa Queen Gulf Resorts sa Medellin.
Gikasugat nila ang usa ka itom nga Mitsubishi pick-up nga nagdala sa plaka SJC-600 gipanag-iya sa gobiyerno, sakay niini si Madrigal, nga gimaniho ni Alberto Naraja, 45, taga Barangay Kanagahan, lungsod sa San Remegio.
Dihang nagkasugat ang duha ka mga sakyanan, nabag-iran sa pick-up ang motorsiklo.
Si PO3 George Ocena, imbestigador sa traffic police sa Bogo nga nahinabi sa Sun.Star Cebu, nibutyag nga wala nila gitanggong ang drayber human nagkasabot sa kabanay sa biktima.
Si Madrigal gitawagan sa Sun.Star Superbalita apan niingon nga dili una makighinabi sa media human na-busy sa pag-atiman sa mga biktima atol ning pagsuwat.
Sa laing bahin, si Madrigal nagplano nga mopasaka og kasong libelo batok kang i Medellin Mayor Ricky Ramirez sa pag-alegar ug nagbutang sa ilang hulagway uban sa sekretarya nga giingong iyang gikarekasyon.
Subling gibarugan ni Madrigal nga wala sila’y relasyon sa iyang sekretarya, bisan sa pagtumaw sa pubiko sa bana niini nga nagsuporta sa pamahayag ni Ramirez.