SENIOR citizens di hatagan og pabor atol sa dinuotay sa bagang duot sa tawo nga moduaw sa nagkadaiyang sam-ang sa dakbayan sa Lapu-Lapu atol sa pagsaulog sa Todos Los Santos ug adlaw sa mga minatay.
Giklaro ni PSSupt. Armando Radoc, hepe sa Lapu-Lapu City Police Office (LLCPO) nga bugtong kahatagan og pagtugot nga mga sakyanang makalahos sa dalan Humay-Humay, barangay Gun-ob mao kadtong modagkot nga ‘person with disability’(PWD) o bakol nga dili makahimo sa paglakaw bisan unsang pangidaron.
Ang mga pribadong sakyanan nga giluwanan sa bakol nga pasahero ang gitugotan nga makalahos sa atubangang ganghaan sa Catholic cemetery sa Humay-Humay apan ginadili ang pag-parking.
Mga senior citizen nga baskug ug makahimo pa sa paglakaw ang gitambagan nga maglakaw
lang una sanglit ang matag sa eskena sa Humay-Humay road, Bukana sa Sityo Sangi, barangay Pajo ug adunay bahin sa dalan paingon sa Sityo Tugas, Gun-ob diin nahimutang ang Municipal cemetery ang gipasirhan.
Ang hawanan sa Hoopsdome maoy gitagana nga parking area niadtong mga managkot nga magdala og sakyanan.
“Kon moingon kag senior citizen daghan pa nila ang baskug pa, kon ato silang tugotan (sakyanan nga makasulod sa maong dalan) maka-create gyud og traffic congestion,” pasabot ni Radoc atol sa press conference niadtong miaging adlaw.
Samtang mga manindahay og buwak ingon man kandila nga makamugna usab og traffic obstruction ang gipasidan-an sa hepe sa City Traffic Management System, Frank Brazil nga di magpatakag puwesto sa ilang baligya.
Gipahibawo ni Brazil nga kadtong magmagahi sa pagpaninda daplin sa dalan diha sa sam-ang, di sila magpanuko sa pagsakmit sa ilang tinda sanglit mag-atang ang trak de karga sa Solid Waste Management nga maoy kargahan sa mga sinakmit.
Apan gitugotan lang kadtong maglukdo o magbitbit sa ilang baligya ingon man niadtong mopuwesto sa dapit nga dili makabalda sa agianan sa sakyanan ug mga tawo.
Gitataw sa maong mga opisyal nga buot lang nila ipatuman ang hapsay ug malinawon nga selebrasyon sa All Saints ug All Souls Day sa upat ka sam-ang sa dakbayan.
Ang mga sam-ang nga ilang gitutokan naglakip sa Catholic cemetery sa dalan Humay-Humay, Municipal cemetery sa Gun-ob, Mactan Island Memorial Garden sa barangay Marigondon ug Olanggo cemetery sa isla sa Olanggo.