GIKATAKDA nga ipatuman ang kausaban sa agianan sa mga sakyanan atol sa kasaulogan sa ika 450 ka tuig sa “Kaplag.”
Ang “Kaplag” nagsaulog sa pagkakaplag sa imahen ni Sr. Santo Niño sulod sa usa ka payag nga nasunog.
Daghang mga kalihukan ang pagahimuon sa kadalanan sugod sa Abril 18 hangtod na sa Abril 28 ning buwana.
Gipahibawo sa Cebu City Traffic Operations and Management (CITOM) nga gikinahanglan ang kausaban sa rota sa mga sakyanan aron paghatag og kahigayonan nga magmalampuson ang selebrasyon.
Buksan kini sa Traslacion sa imahen ni Señor Santo Nino alas 7 sa buntag sa Abril 18 gikan sa Basilica Minore del Santo Niño paingon sa simbahan sa Redemtorist.
Magsubay ang parade gikan sa Basilica, moliko paingon sa dalan D. Jakosalem, molapos paingon sa General Maxilom, moliko sa dalan Manalo ug Queens Road dayon sulod sa Redemtorist Church.
Lain na usab nga Traslacion ang himuon sa petsa 24 niining buwana, sa alas 9 sa buntag gikan sa Basilica paingon sa simbahan sa San Nicolas.
Ang prosisyon magsugod sa Basilica, mo-left turn paingon sa D. Jakosalem, mo-right turn sa Magallanes hangtod sa dalan Tupas ug dayong sulod sa simbahan sa San Nicolas.
Sa di pa himuon ang Fluvial Procession sa kadagatan, ang imahen sa Señor Santo Niño gikan sa simbahan sa San Nicolas, dad-on na usab sa simbahan sa Saint Joseph sa Mandaue sa Abril 26, alas 9 sa buntag.
Ang rota niini gikan sa San Nicolas Church, mogawas sa dalan Tupas, mo-right turn sa T. Abella st., right turn sa C. Padilla ug modiritso sa dalan Colon, moliko sa Basilica, magsubay sa Osmeña boulevard, mo-left turn sa M.J. Cuenco ug mosubay hangtod nga maabot og Saint Joseph Church sa siyudad sa Mandaue.
Sa maong adlaw usab, ang 80 ka mga obispo gikan sa nagkalain-laing kanasuran nga motabang alang sa preparasyon sa International Eucharistic Congress (IEC) moselebrar sa misa sa pagka alas 5:30 sa hapon sa Basilica.
Ang tibuok dalan nga naglibot sa simbahan sirhan atol sa kalihukan.
Sa pagka Lunes, Abril 27, himuon ang fluvial procession nga sugdan sa Saint Joseph Parish sa alas 6 sa buntag ug modunggo sa Pier Uno.
Isunod ang prosesyon nga magsubay sa Legaspi hangtod paingon sa Basilica.
Sa Abril 28, himuon na ang dakong misa tungod sa anibersaryo sa Kaplag sa Señor Santo Niño.
Pagka alas 7 sa gabii, himuon ang Sinulog street dancing gikan sa Abellana National School hangtod nga moabot sa Basilica subay sa Osmeña boulevard.
Giawhag sa Citom ang mga motorista ug mga sumasakay nga adunay mga biyahe sa maong mga adlaw ug oras sa paghimo og pagplano sa ilang mga lakaw aron di maapektuhan sa pagkalangay sa ilang biyahe sa nahisgutan nga mga dalan ug lugar.