GIBAWI sa Cebu City Council ang special permits sa duha ka cellular sites sa Barangay Apas human gireklamo sa mga lumolupyo kay dunay giingong nangamatay ug nangasakit og cancer sa ilang dapit.
Usa ka cellsite gipanag-iya sa Globe Telecom ug ang usa sa Sun Cellular nga sister company sa Smart Communications.
Si Atty. Froilan Catelo, Globe chief legal counsel, wa mauyon sa lakang sa konseho.
Matod niya nga adunay sayop nga pagtuo nga ang cellsites makahatag og cancer. Usa kini ka “urban myth,” matod niya.
Iyang gitumbok ang World Health Organization nga niingon nga ang radio frequency gikan sa cellsites ubos kaayo u di makadaut sa panglawas sa tawo.
Magpadayon ang Globe og tabang sa Siyudad sa Sugbo aron matagaan og makiangayon nga proseso ug makab-ot ang saktong desisyon, sumala ni Catelo sa usa ka press statement.
Sa bahin sa Smart, si Atty. Jane Paredes, senior manager sa public affairs-Visayas ug Mindanao, niingon nga maghuwat una ang Smart sa pormal nga komunikasyon gikan sa Siyudad una pa mohimo og tukma nga lakang.
Si Cebu City Mayor Michael Rama niingon nga di ang Konseho maoy makabawi og permit, kon di ang executive department ra.
Ipasusi niya ang nahitabo sanglit bag-o pa siyang nahibaw niini.
Si Ramil Ayuman, barangay kapitan sa Apas, ug mga lumolupyo sa Calvary Hills pinangulohan ni Dr. Porponio Lapa Jr., ningtambong sa session kagahapon.
Si Konsehal Mary Ann de los Santos maoy niduso og resolution pagbawi ug pagpatangtang sa cellsites sulod sa duha ka buwan.
Gikalipay kini sa apektadong mga pamilya kay giuyonan sa tanang mga konsehal.
Sila si Ayuman ug Lapa niingon nga moabot sa 25 ka mga tawo ang nangasakit og lainlaing matang sa cancer ug ang uban nitaliwan na sukad ang usa sa duha ka cellular sites nabutang sa dapit.
Matod ni Lapa nga sa 2014, lima ang nangasakit ug sila naglibog sanglit ang mga biktima way kaliwat nga adunay cancer.
Matod ni Lapa nga adunay nasakit nga padulong na operahan sama sa stage 3 breast cancer ug ang uban gipaubos sa chemotherapy.
Siya niingon nga magmalinawon na ang ilang mga huna-huna human sa hukom sa Konseho.
Samtang si Ayuman niingon nga gawas sa problema sa panglawas, gibasehan usab sa ilang reklamo ang kakuwang sa konsultasyon sa mga lumolupyo sa wa pa matukod ang duha ka mga tower nga giingong natukod niadtong 2000 ug 2004 duol sa mga balay.
Si Ayuman nagpasalamat ngadto sa konseho sanglit ang mga konsehal sa Team Rama ug Bando Osmeña Pundok Kauswagan nagkahiusa sa pagpaminaw sa ilang problema nga ilang gipaabot duha na katuig ang nakalabay.
Matod ni Lapa nga wa silay konkreto nga basehan, apan subay sa ilang nabasa sa internet, ang radiation gikan sa cellular sites makasakit og cancer.
Apan duna say samang pagtuon nga wa pay klaro ug tukmang mga kasayuran nga magtumbok nga ang cellular sites magdala og cancer.
Ang konseho maoy naghatag usab og special permits aron mapabarog ang duha ka mga cell site.