NIPATUMAN ang Cebu City Medical Center (CCMC) sa bag-ong sistema sa pagkuha og medical certificate alang sa mga tawong dinakpan sa awtoridad sa dili pa kini ibalhong sa bilanggoan.
Si Atty. Re Cris Panugaling, medical director for administration, niingon nga sukad niadtong Huwebes sa miaging semana, abli na sila sulod sa 24-oras alang sa pag-isyu sa medical certificates, diin kanhi makuha lang sa oras nga tingtrabaho sa adlaw.
Dili na usab sila mangayo og commitment order gikan sa ahensiya sa gobiyerno ug adto na direkta sa arresting officer nga mahimong awtomatik nga endorser sa suspek.
Matod ni Panugaling, nipasalig ang mga internal medicine doctor sa CCMC nga moatiman sa suspek nga mohatag dayon og sertipiko sulod sa singko ngadto sa diyes minutos huan sa iyang konsultasyon.