PATAY ang menor de edad human kini gipusil sa kontra sa iyang maguwang tungod lang sa cellphone.
Kini nahitabo pasado alas 10 sa milabay nga gabii sa eskina dalan Colon ug Leon Kilat, dakbayan sa Sugbo.
Ang biktima nga naigo sa ulo giila nga mao si Morshid Macaombao Bao, taga sityo Kawit, Barangay Ermita, dakbayan sa Sugbo samtang ang suspek giilang mao si Mamainty Abdul Emam, hingkod, mamaligyaay og second hand nga cell phone.
Si Emam didto na sa lungsod sa Santander sa nadakpan sa kapulisan nga nipahigayon og hot pursuit operation.
Sa pasiuna nga imbestigasyon nga gihimo ni SPO4 Rey Cuyos ug mga kauban sa Homicide Section sa Cebu City Police nga naglakaw ang biktima sa dihang gisundan sa suspek dayon gipusil ang ulo.
Human sa pagpamusil, nisibat si Emam sakay sakay og de pasaheroang bus paingon sa habagatang Sugbo aron adto manukad sa pagtago.
Ang biktima nga naigo sa iyang ulo, daling gidala sa Cebu City Medical Center, apan namatay paglabay sa pipila ka minuto sukad sa pag-abot sa ospital.
Nakadawat og impormasyon ang kapolisan kon diin paingon si Emam hinungdan nga nakig-alayon ang Cebu City Police Office (CCPO) sa kapolisan sa Santander.
Naabtan ang suspetsado nga mopaingon na unta mosakay sa barge tabok sa isla sa Negros.
Dugang nasayran sa kapolisan nga ang suspek ug ang maguwang sa biktima nga si Almanar Bao nagkaaway tungod sa cellphone.
Ang suspek dunay gibaligya nga cell phone kang Almanar, apan wa mopalit ang maguwang sa biktima hinungdan sa kasuko ni Emam.