UPAT ang nangamatay sa managlahing aksidente sa kadalanan sa lalawigan.
Usa ka delivery van nahagbong sa bung-aw ug naugbok sa sapa sa Tambis, Barangay Poog, dakbayan sa Toledo, kagahapon sa alas 10:50 sa buntag, duha ang patay.
Napisat si Oscar Layson, 29, taga Barangay Mabolo, dakbayan sa Sugbo, drayber sa 6-wheeler delivery ug truck boy nga si Reymart Cañeza, hingkod, taga Barangay Guadalupe, dakbayan sa Sugbo.
Si Amelita Lapatis, 42, minyo ug taga Barangay Bunga, angol human nasaghiran sa van.
Matod ni PO3 Cinco, nahaybul ang sakyanan samtang nagdulhog sa likuong karsada hinungdan nga nawad-an sa kontrol sa manobela ang drayber.
Samtang, usa ka 70 nga lola patay human ang gisakyang traysikol gidumbol sa laing sakyanan, drayber ug laing duha ka pasahero naangol sa disgrasya niadtong Sabado sa alas 4:15 sa hapon sa Barangay Langtad, lungsod sa Argao.
Si Irene Mamac, taga Barangay Talaytay, Argao, namatay ug nangaangol sila si Pederito Geabroso, 33, drayber sa trisikol, mga pasahero nga si Viviana Genabi, 62, ug anak nga si Jane, 9,.
Gipriso si Rodel Recaborda 38, minyo, ug drayber sa KIA Utility vehicle sa Cebu Electric Cooperative (Cebeco).
Sa laing bahin, usa ka ulitawo patay ug seaman grabi human nagkabangga ang ilang motorsiklo niadtong Sabado sa alas 7:30 sa gabii sa Barangay Liong, lungsod sa Dumanjug.
Si Fil Vincente Lantiza, 26, ulitawo, taga Lawaan, Alcantara, patay ug grabe ang seaman nga si Fritzjay Canoy, 25, ulitawo ug taga Dumanjug.