BLANGKO pa ang kapulisan sa dakbayan sa Sugbo sa motibo sa pagpusil patay sa usa ka call center agent gawas sa edipisyo nga iyang gitrabahoan sa IT Park sa Brgy. Apas, dakbayan sa Sugbo.
Ilang gitutukan ang anggulo nga posibling personal nga bangi ug kaila ni Diogracias Guda III, 23, ang killer.
Ang pagpamusil kagahapon sa mga alas 12:45 sa kaadlawon nakuhaan og footage sa close circuit television (CCTV).
Si Guda, taga taga Antipolo del Sur, Lipa City, apan nag-abang sa Timpolok, dakbayan sa Lapu-Lapu.
Sa pasiuna nga imbestigasyon nga gihimo nila ni SPO1 Rommel Bangcog ug mga kauban sa Homicide Section sa Cebu City Police Office (CCPO) nagbutyag nga sakay ang biktima sa iyang motorsiklo.
Sa nakita sa CCTV footage, iyang gihubo ang iyang gisul-ob nga helmet ug dayong park sa iyang motorsiklo.
Nisulod na siya sa I1 Tower apan ang gunman nisunod ug nisangpit kaniya.
Nilingi ang biktima ug dayong balik sa iyang agi aron atubangon ang mao nga lalake.
Nakita sa CCTV nga mibunot og armas ang maong tawo ug dayong pusil makausa kang Guda tumong sa dughan.
Nisibat ang gunman sakay sa usa ka motorsiklo.
Nakita usab sa CCTV ang gunman nga mga 10 minutos nang naghuwat kang Guda.
Nagsigi kini og balikbalik hangtud nga mipundo human makita si Guda nga nagdung paingon sa lugar.
Matod ni Bangcog nga si Guda dunay asawa ug anak nga toa sa abroad.
Ila pang susihon ang pagkatawo sa biktima aron magiyahan sila sa ilang imbestigasyon.