Cellphone app nakapasayon sa pagpangitag dapit sa mga delegado

MAS sayon na alang sa mga delegado nga ningtambong sa mga tigom sa Asia-Pacific Economic Cooperation (Apec) dinhi sa Sugbo ang pagpangita og mga dapit nga kasuroyan pinaagi sa application sa ilang cellphone.

Ang kagamhanan sa lalawigan sa Sugbo sa pakigtambayayong sa InnoPub Media ug Smart Communications nilusad sa Cebu Guide application kagahapon sa Dignita­ries Lounge sa Kapitolyo.

Atol sa Kapistorya nga gipasiugdahan sa Provincial Information Office, si Max Limpag, co-founder sa InnoPub Media, nagkanayon ang app makatabang sa mga delegado sa pagpangita og mga dapit sa Sugbo diin sila makaestar, makita ang kinaham nga mga tourist destinations sama sa diving ug snorkeling ug ang kasaysayan sa mga lugar sa Sugbo.

Makita usab sa app ang listahan sa accredited tour guide operators.

Ang app aduna usab mga numero sa telepono sa mga consul office ilabi na alang sa emerhensiya ug Bisaya phrases nga makata­bang sa mga langyaw sa ilang pag-estar dinhi sa Sugbo.

Apil sa app ang kasayoran sa nagpadayon nga mga tigom sa Apec.

Ang mobile app ma-download nga libre sa Google Play Store a­lang sa mga Android phones ug Apple App Store alang sa iOS. Ma-download usab ang app gikan sa apps.myguide.ph/cebu/.

Si Atty. Jane Paredes, senior manager sa Smart Public Affairs-VisMin, niingon nga sa pakigtambayayong sa InnoPub ug provincial government sa Cebu Guide mas pakusgan nila ang network coverage ug internet service sa Sugbo.

Matod niya sumpay kini sa nasugdan na nila nga programa nga nagdasig sa mga komunidad nga maghimo og ilang kaugalingon nga website ug Facebook page.

“We’re really going down to the communities so that they can develop their content. This time parang we’re revolutionizing the community... We’re empowering them to be able to tell the story and to market their place via social media,” sumala ni Paredes.

Si Assistant Secretary Lito Na­dal, deputy director general for me­dia operations, niingon nga maka­tabang ang Cebu Guide sa pag­palambo sa turismo sa Sugbo.

Si Limpag nidugang nga gipili nila ang pagbutang og app sa smartphones tungod kay base sa usa ka pagtuon ang mga Pilipinhon mo-average og 174 minutos matag adlaw sa paggamit og smartphones, 150 minutos sa tablet, 140 minutos sa laptop ug 99 minutos sa pagtan-aw og telebisyon.