GIAWHAG sa Cebu City Transportation Office (CCTO) board ang City Legal Office (CLO) sa pagsang-at og ejectment case batok sa mga tag-iya og estruktura nga nilapas sa sidewalk sa Kamagong road sa Barangay Lahug ug dalan Cabantan sa Barangay Luz.
Si Atty. Rey Gealon, executive director sa CCTO, nibutyag sa Sun.Star Superbalita nga giaprobahan on mass ang resolution nga ilang gipalabang atol sa ilang senimana nga tigom.
Tuyo sa CCTO board nga magamit ang duha ka mga karsada nga diversionary road aron moluag ang kahuot sa trapiko sa dalan Juan Luna ug sa Gorordo Avenue sanglit adto na moagi hilabi na ang mga pribadong sakyanan.
Apan iyang gibutyag nga inay adto moagi ang mga private vehicle, molikay na hinuon kini sa Kamagong ug Cabantan gumikan sa kalisod sa agianan gumikan sa encroachment.
“Kon ma clear na siya, alternative road na siya padong sa Parklane hotel, pasabot dili ma ma trapik ang Gorordo. Kasagaran man gud dili na moagi diha kay daghan na ang ni-encroach nga tindahan, karenderia, illegal settlers naa sa dalan,” paghulagway ni Gealon sa Kamagong road.
“Ang Cabantan road wala nay sidewalk kay ang ilang mga balay ni-encroach na ang ilang ikaduhang andana unya ang uban naa gyuy balay sa sidewalk, naninda, karenderia. Kon ma clear na hilabi na kon magawsan og demolition order magamit nana siya nga dalan.” butyag ni Gealon sa bahin sa Cabantan.
Matod ni Gealon nga di angay mabalaka ang apektado sanglit anaa ang Division for the Welfare of the Urban Poor nga maoy mosawo sa mga apektado para mahatagan og relocation site.
Ang Kamagong ug Cabantan pulos public road hinungdan nga nakig-alayon na usab ang CCTO ngadto sa buhatan ni Mayor Michael Rama sa posibleng pagtuon unsay maayong buhaton.
Dugang ni Gealon nga nakig-alayon na usab sila sa Prevention Restoration Order Beautification Enhancement nga maoy gitahasan sa City Government sa pagguba sa mga illegal structure hilabi na kadtong anaa sa sidewalk.