MGA pasahero nga sakay sa M/V St. John Paul II nga iya sa kompaniyang 2Go nga adunay biyahe nga Manila-Cebu ug Cagayan de Oro nangreklamo kay matod pa hapit 24 oras na sila nga stranded kay nalangay ang ilang biyahe human giayo ang roller sa ilang rampa kay naguba.
Reklamo usab sa mga pasahero nga matod pa dli sila makakanaog kay walay hagdanan ug kadtong gustong mobalhin og laing barko di makabalhin kay di sila pabalhinon.
Apan ang 2Go company mipasabot nga duna lang silay giayo ug ang tanang mga pasahero gi-akomodar man ug dili tinuod nga wa nila pakanauga.
Kagahapon dihang gibisita sa mga tigbalita ang Pier 6, naabtan pa ang mga kawani nga nagtrabaho sa maong barko.
Ang mga pasahero nga wa makakanaog igo nalang sa paglantaw sa gawas nga bahin dungan sa pagsyagit nga delayed ang ilang biyahe.
Usa sa mga pasahero niini mao si Raul Aleria, kanhi kapitan sa Barangay Bogo, Cagayan de Oro City ug paingon na mopauli.
Dihang nahinabi sa sibyaang dyHP pinaagi sa phone patch, siya nisaysay nga sila gipakaon apan ang problema kay di sila mahimong makanaog kay lagi wa silay kaagian.
Matod niya nga wa sila gipabalhin og laing barko nga sa ilang pagtan-aw, sama sila nga gi-hostage nga naghatag og dugang kalangay ilabi na ang uban nila nagdali kay dunay mga appoinment.
Sa pagkutlo ning balita, nipasalig si Lito Salvio, assistant vice president sa 2Go group, nga ilang ibalhin ang mga pasahero kagahapon sa hapon tungod kay gipaabot nga alas 5 moabot ang barkong St. Leo the Great.
Andam usab sila niadtong gustong mobalhin og laing barko ug sa gustong magpa refund ug mo-refund pud ang kompanya.
Si Coast Guard Cebu Station Commander Agapito Bibat nagkanayon nga ang St. John Paul nga barko di mahimong mobiyahe kon di pa maayo ang rampa alang sa kaluwasan sa mga pasahero.
Gipasabot usab niya nga slanting ang posisyon sa barko kay nag-ayo sa rampa.
Kon isikit sa pier ang barko unya ang rampa naa sa likod nga bahin sa barko, di kini maayo hinungdan nga di mapaubos ang damyo.
Nasayran nga ang mga pasahero nga gikan sa kaulohan anaa sa 350.
Ang Cebu paingon sa Cagayan anaa sa 219. Ang tanang mga pasahero giakomodar sa hotel management nga onboard sa barko.
Niadtong Dominggo nigikan ang barko gikan sa Manila ug gilauman nga moabot alas 7:00 sa buntag niadtong Lunes.
Alas 10 sa buntag niadtong sa Lunes maoy oras nga mobiyahe unta sila padong sa Cagayan, apan wa masunod ang schedule kay alas 2:00 sa hapon na sila nakadunggo dinhi sa samang adlaw.
Kon nakabiyahe pa sila niadtong Lunes, kagahapon unta sila moabot sa Cagayan de Oro City.