DILI ikampanya sa mga tigpaluyo ni Kongresista Leni Robredo ang kapares niini nga si kanhi Department of Interior and Local Government Secretary Mar Roxas, ang pambato sa Liberal Party sa eleksyon sa Mayo sunod tuig.
Ang mga dumadapig sa kongresista sa Sugbo nga gitawag og Cebu for Leni, nilusad sa ilang grupo kagahapon sa Josh and Matthew’s Cafe sa Gorordo Ave., siyudad sa Sugbo, nga gitambungan sa kamaguwangan nga anak niini nga babaye nga si Aika.
Si Atty. Magdalena Lepiten, coordinator sa grupo, nipasabot nga si Leni lang ang ilang ikampanya ug paluyohan tungod kay nahan-ay na ni Roxas ang sistema niini sa pagpangampanya.
Nakahukom ang Cebu for Leni, matod niya, nga motabang sa pagpangampanya alang lang kang Leni tungod kay nakita nila nga nangiwit kini sa ubang mga kandidato ug wala pa mailhi sa ubang mga tawo.
“We are not part of any political parties... I feel that Leni Robredo is the right candidate,” pamulong ni Lepiten.
Si Haley Atienza, usa sa mga organizer sa Cebu for Leni, niingon nga lainlain ang mga kandidato nga ilang paluyohan sa pagka presidente.
“We agreed this group is solid for Leni,” suma pa niini tungod kay matod niya ang kapikas ni anhing Department of Interior and Local Government Secretary Jessie Robredo ang nanghingusog og participatory government.
Nagtuo usab ang grupo nga dunay igong katakos si Leni nga mahimong bise presidente labi na sa kasinatian niini isip usa ka volunteer lawyer sa usa ka non-government organization sud sa 10 ka tuig diin nangalad siya sa ubos nga sektor.
Si Aika niangkon nga nangiwit ang iyang inahan sa kampanya kon itandi sa uban modagan pagka bise presidente.
“Alam ng lahat kulang kami sa resources, isa itong challenge sa amin,” sumala niini.
Apan siya masaligon nakabentaha ang iyang inahan nga si Leni sa ubang mga mokandidato pagka bise presidente bisan og kadaghanan mga senador, tungod kay kini gikan sa ubos nga sektor ug nasayod kini kon unsay nahitabo ug suliran sa labing ubos nga sektor.
“Para wala naman sa kanilang kapareha sa nanay ko na galing sa baba sa basic sector. Mahirap magbigay ng solution if hindi galing sa basic sector,” pamulong sa kamaguwangan nga anak ni Leni.
Siya nidugang nga mas gipalapdan nila ang paghatag og kasayoran bahin sa iyang inahan sa social media ug nanghinaot nga karong Enero o Pebrero mas daghan pa ang makaila niini.
Ang mga organizer sa Cebu for Leni kadaghanan mga manlalaban nga gilangkuban nila ni Atty. Frank Malilong, Lepiten, Atty. Marilevi Wee, Atty. Fionah Bojos, Atty. Cathy Alvarez del Rosario ug Atty. Myrfi Gonzalez.
Aduna usab sila’y mga sakop gikan sa ubang sektor sama ni Zita Abellanosa sa business sector, non-government organization sector nga sila si Haley Atienza, Jovie Cadungog, Eric Auza ug uban pa.
Si Aika namahayag nga espesyal ang Sugbo sa ilang kasingkasing kay kini ang katapusang lugar nga nabisita sa ilang amahan sa wa pa mamatay dihang mahagsa ang gisakyan niini nga eroplano paingon sa ilang balay sa Naga City, Camarines Sur gikan nitambong og kalihokan sa Sugbo.