GIKULATA ba sa mga jail guard sa Carcar City Jail ang usa sa mga piniriso nga ningsuway sa pag-eskapo sa bilanggoan niadtong Martes?
Maorag mao ni ang nahitabo base sa close close-circuit television (CCTV) footage nga nagpakita nga ang tulo ka mga guwardiya nagpuli-puli pagkulata sa Genson Dawat.
Si Dawat napakyas pag-eskapo gikan sa prisohan ug nabiyaan sa iyang duha ka mga kauban sa pagpanglayat gikan sa 2nd floor.
Si Dawat, kinsa napriso sa kasong rape, nisuway pag-eskapo kauban nila ni Rodelio Apura ug Junard Ramos.
Apan napakyas siya human maangol sa iyang paglayat sa ikaduhang andana sa jail sa Sitio Takdog, Barangay Poblacion 3 niadtong Martes sa gabii.
Sila si Apura ug Ramos wa pa madakpi sa pagsuwat ning taho.
Ang video, nga gihatag sa wa mailhing tinubdan, nagpakita kon giunsa sa tulo ka mga piniriso sa pag-eskapo.
Ilang gisabligan og tubig nga gisagulan og gipusa nga sili ang duha ka mga guwardiya.
Human niini, ang tulo ka mga inmate nakaeskapo pinaagi sa paglayat gikan sa 2nd floor.
Apan ang tiil ni Dawat nasangit sa koral, niresulta sa iyang pagkapiang ug kapakyas sa pag-eskapo.
Samtang ang mga jail guard ninggukod sa mga pugante, ang duha ka mga bantay nakadakop kang Dawat nga naangol na.
Gipabarog siya sa lugar duol sa iyang gitugpahan.
Nini, usa sa mga guwardiya nisukmag kang Dawat hinungdan sa iyang pagkatumba samtang nagping-it sa kasakit.
Human niini, usa ka babayeng nagsul-ob og senina nga green ug maong nga niapil sa pagpangita mga binilanggo, niduol ug nipatid kang Dawat sa makadaghang mga higayon.
Dihang gikuhaan sa Sun.Star Cebu og komentaryo, si Carcar City Mayor Nicepuro Apura niingon nga nakadawat siya og samang kopya, apan ang iyang nakita ang pag-eskapo ra sa mga binilanggo.
Niingon si Apura nga kon nahitabo ang torture sud sa jail, di kini niya pasagdan.
Nitawag usab ang Sun.Star sa Carcar City Jail apan way nanubag.