Talikala: Maoy nangamahan sa pamilya | SunStar

Talikala: Maoy nangamahan sa pamilya

Time to read
2 minutes
Read so far

Talikala: Maoy nangamahan sa pamilya

Monday, February 29, 2016

Nangamahan. Kay kinamaguwangan sa pito ka mga magsuon, sa linghod nga edad nanarbaho na isip mangasalay si Kris John Sumbi aron dunay ikasuporta sa iyang mga manghod. Karon, usa na siya sa mga sinaligan nga lechonero sa Zubuchon ug ubang mga sakop sa iyang pamilya kauban na usab niya nga nag-alagad sa mao nga kan-anan. (Alan Tangcawan)

BISAN sa kainit sa baga sa mga uling sa pagluto og baboy aron mahimo nga lechon, wa kini igsapayan ni Kris John Sumbi, taga Villalon Drive, Barangay Capitol Site, siyudad sa Sugbo.

Sa iyang pagsakripisyo isip usa ka lechonero, iyang natabangan ang iyang mga igsuon nga makatungha ug adunay makaon sa matag adlaw.

Paghuman niya og tungha sa high school sa Ramon Duterte Memorial High School niadtong 2008 nangita na siya og kapanginabuhian ug nakatrabaho og extra sa pangidaron nga 16.

“Nangita nako og extra-extra para makatabang ko sa akong mama, sa akong pamilya,” asoy ni John sa Sun.Star Superbalita.

Isip kinamaguwangan sa pito ka managsuon, siya ang nibarog nga breadwinner sa pamilya ug niako sa responsibilidad sa usa ka amahan.

Matod niya nagbisyo ang iyang amahan sa wala pa mamatay sama sa paggamit og ginadili nga drugas ug dunay mga higayon nga wala kini mopauli sa ilang balay labing dugay usa ka semana.

Kini ang hinungdan nga sa linghod nga panuigon nakakat-on na siya nga manarbaho ug magsakripisyo alang sa pamilya.

Niadtong 2010, nasulod siya sa Zubuchon, inila nga kan-anan og lechon baboy ug ubang pagkaon sa Sugbo, isip extra nga lechonero human pahibaw-a sa amigo sa ilang silingan nga nanginahanglan og lechonero ang kompaniya.

Sa maong panahon, matag baboy nga malechon ni John, gibayran siya og tag P50.

Si John niingon nga nagtinarong siya sa pagtrabaho ug gipakita ang iyang pagkagu­hian ngadto sa mga tag-iya hi­nungdan nga nahimo siya nga regular nga lechonero sa Zu­­­buchon hangtod sa kasamta­ngan ug magdawatan na og mi­ni­mum nga suhulan matag adlaw.

Siya nalipay kay nakatrabaho og apil ang iyang inahan nga si Maria Ana, 37, isip gardener sa compound sa Zubuchon sa Barangay Capitol Site, dakbayan sa Sugbo.

Apil sa nakasulod og trabaho sa kompaniya ang laing mga manghod ni John nga sila si Jessa Mey, 21, isip kitchen helper ug Jojie, 19, isip gardener.

Si John nakakat-on pag­lechon og baboy gumikan sa gabay sa karaan nga mga lechonero sa Zubuchon.

“Dili lalim ang akong trabaho kay init mag-atubang sa baga og pila ka oras. Dili lalim ang pag-alsa sa baboy kay init ang kawayan inig human og luto,” asoy ni Sumbi sa Sun.Star Superbalita.

Sa paglechon, siya naglikay nga dili mahilaw ang pagluto sa mga baboy, tungod kay kon dunay makita nga dugo sa bukog ug unod niini, iuli kini.

Sa trabaho, naandan na niyang gimbuhaton ang paghakot og uling, magpabaga, tusukon ang lawas sa mga baboy gikan sa tangkugo hangtod sa lubot og dagkong dagom aron dili moburot ang panit ug magisi.

Ang paglechon og baboy, matod niya, mag-agad sa gidak-on niini nga kasagaran molungtad ngadto sa 3-4 ka oras.

Kaniadto mas lisod ang pag­lechon sa baboy tungod kay mano-mano ang ilang pag­himo, ka­ron nag­­ga­mit na si­la og ma­kina.

Siya ni­ang­kon nga dunay mga higayon nga maibog siya mo­kaon sa lechon ba­boy nga iyang giluto, apan nagpugong si­ya sa pagkuha og ga­may niini tungod kay dili siya gusto ma­wagtangan og pagsalig ang tag-iya niya ug ma­wagtangan si­ya og trabaho.

Ang pagsakripis­yo ni John alang sa pamilya sama kalami sa lechon ba­boy nga u­­­sa sa mga pa­borito nga pagkaon sa mga Pinoy nga iyang giluto.

Andam siya nga ipadaplin ang iyang pangandoy sa kina­buhi alang sa iyang mga igsuon.

“Tungod sa among kalisod gipadaplin nako ang pag-eskwela sa college, giuna nako akong pagtrabaho. Naluoy ko sa akong mga manghod nga gagmay pa,” dugang ni John.

Gipatik sa mantalaang Superbalita Cebu Marso 01, 2016.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments