NAKAGAWAS na sa bilanggoan ang duha ka mga abogado nga minyo ug dalaga nga nasakpan sa asawa uban sa kapulisan sulod sa usa ka pension inn sa Barangay Mabolo, dakbayan sa Sugbo.
Sa sayo pa, ang asawa sa abogado nga usa usab ka abogada ang mi-reklamo sa kapulisan sa Mabolo nga ang iyang bana nga abogado uban sa iyang uyab nga abogada ni-check in sulod sa pension inn.
Ang duha nadakpan sud mismo sa pension inn human sa taas nga oras nga negosasyon sa kapolisan.
Si Chief Insp. Wildemar Tiu, hepe sa Mabolo Police Station, mibutyag nga niadtong milabayng Biyernes unang nakagawas ang abogada nga nasikop ug pagka adlawng Sabado gibuhian usab ang abogado human sila makapiyansa.
Ang abogada naka-piyansa og P20 mil human kini pasakai og kaso paglapas sa Article 334“ kon “pagpanapaw” samtang ang abogado nakapiyansa og P30 mil isip paglapas sa “Violence Against Women,” matod ni Tiu.
Bisan pa man og napasaka na ang kaso batok sa duha, nagdumili si Tiu sa pagbulgar sa ilang mga pangalan.
Apan ang Superbalita Cebu mitago una sa pangan sa mga akusado gumikan sa kasensitibo sa kaso nga dunay implikasyon sa ilang tagsatagsa ka pamilya.
Ang duha bisan og napasakaan na og mga kaso sa piskaliya gikan sa pension inn, wa motug-an sa ilang mga pangalan.
“Dihay ilang mga abogado mipahibawo nako sa among pag-abot gikan sa lodging house nga ilang i-invoke ang ilang rights to remain silent,” matod ni Tiu.
Sukad sa ilang pagka sikop sa milabayng adlaw, daghang abogado nga dapig sa isig ka kampo ang mibisita sa buhatan ni Tiu sa Mabolo Police.
Mismo ang asawa sa abogado nga nireklamo maoy mipasaka og kaso batok sa duha.