SA wa pa siya nahimong konsehal, si Emmarie Ouano-Dizon, mas naila nga Lolypop, nag-alagad isip executive secretary sa iyang amahan nga si Thadeo Ouano sa dihang mayor kini sa Mandaue City niadtong 1998-2007.
Nidagan ug midaog siya pagka konsehal niadtong 2010 ug nagpasubli niadtong 2013 diin siya ang nitumaw nga number one councilor.
Karon, sa edad nga 46, gusto niyang moserbisyo sa mga Mandauehanon isip mayor sama sa iyang lolo ug amahan.
Lolo: Alfredo Ouano o Pedong, mayor 1988-1998
Amahan: Thadeo Ouano o Teddy, mayor 1998-2007
Brother: Jonkie Ouano, nidagan pagka mayor niadtong 2007 apan napilde ni Jonas Cortes; magpapili pagka Provincial Board member karon nga piniliay
Brother: Alfie Ouano, magpasubli og pili isip konsehal sa Consolacion
“One reason nga nidagan ko is to clear our name. I want to prove to Mandaue that the Ouanos’s purpose is to serve and help people. Luoy kaayo tong gibuhat nila sa akong lolo. Iyang legacy nga maayo kaayo, pinangga sa mga tawo, naguba aning lamppost ug shabu lab,” matod ni Lolypop.
Tuig 2007, giuyog sa dakong kontrobersiya ang administrasyon sa iyang amahan tungod sa pagpataud og lamppost, suma sa Commission on Audit, “overpriced lampposts” sa kadalanan sa mga siyudad sa Mandaue ug Lapu-Lapu alang sa usa ka dakong international event sa Cebu, ang Association of Southeast Asian (Asean) Summit.
Na-raid ang usa ka dako nga shabu laboratory nga nahimutang sa Barangay Umapad ug nasakmit ang shabu nga nagbalor og P1 billion ug nasikop ang siyam ka Chinese nationals ug duha ka Pinoy. Gidudahan nga si Teddy, kinsa mayor niadtong higayuna, nahibaw kabahin sa operasyon sa shabu lab sa iyang siyudad.
Panalipod ni Ouano-Dizon, way nasulod bisan usa ka sentimo sa panudlanan sa dakbayan tungod kay ang bidding didto man gihimo sa Manila.
Ministeryal ang paglagda sa mayor sa program of works and estimates (Powe) kay na-review ug napirmahan naman kini sa city engineer. Gipirmahan sa iyang papa ang Powe “kay nasuko naman si President Gloria Arroyo nganong nalangay.”
“Wa gyuy kwarta nisud ato sa Mandaue. Nahug lang nga ang Mandaue gihimong scapegoat sa taas (national government).”
Bisan pa man niini, wa matarog si Ouano-Dizon kon gigamit man gani sa iyang kontra ang mga isyu mahitungod sa shabu lab ug lamppost batok kaniya.
Kampante siya nga nahibaw ang mga Mandauehanon sa iyang batasan nga motabang gyud sa mga tawo bisan og way kwarta ug pagtabang nga way gipangayo nga bawos.
Lumad
Ang iyang pagkalumad nga Mandauehanon maoy nakapalabaw niya ni Luigi Quisumbing.
Natawo, nagdako ug nagpuyo siya sa Mandaue City.
“Nakaadto na gyud ko sa lain-laing suok sa mga barangay. Mao nga para nako, I feel nga mas kahibaw ko sa mga concerns and sentiments, mas ma-addressed nako ang problema sa mga ordinary people.”
Di siya anino sa iyang amahan sa dihang nagsugod siya pagkakonsehal. Naningkamot siya nga mailhan sa iyang pagka-siya pinaagi sa pakighimamat sa mga tawo.
Dinaliang kalabotan
Ang trapik sa Mandaue maoy una niyang tutokan inig lingkod niya isip mayor. Unsaon niya pagsulbad ang usa ka problema nga nagkaanam og kagrabe ug kadako?
Nanghinaot siya sa iyang kadaugan isip mayor sa Mandaue City ug sa kang Winston Garcia isip gobernador sa pagpatuman aning mga lakang sa pagsugpo sa traffic monster sa Mandaue.
Trivia
Yes to seafood, lechon, white, jeans, masareal, volleyball
No to mangluto, manglaba
Tungod sa iyang ka-busy, ang Sunday mass kuyog ang iyang pamilya iatol nalang nila sa misa sa patay. Matod sa usa sa mga nakaila niya, si Lolypop ang unang mupadayag sa iyang kasubo ug simpatiya sa pamilya nga namatyan. Magpadala dayon siya og buwak para sa patay ug adtuon niya ang haya.