TUNGOD sa rekomendasyon sa Provincial Disaster Risk Reduction Management Office (PDRRMO), gipahunong una ang operasyon sa canyoneering sa mga lungsod sa Alegria ug Badian tungod sa daghang mga kalapasan nga nakita.
Makig-alayon sab ang PDRRMO sa Mines and Geosciences Bureau (MGB) aron ipasusi ang nangliki nga bahin sa canyoneering area.
Ang PDRRMO nakakita og mga risgo sa dapit hinungdan nga buot nilang suspensuhon una ang canyoneering activities.
Niadtong Mayo 10, nihimo og risk assessment ang PDRRMO sa lungsod sa Alegria, diin nabantog ang canyoneering activity.
Nasuta sa PDRRMO nga di luwas ang kalihukan.
Ang DRRM officer nga si Dennis Chiong, kinsa sakop sa risk assessment team nga gipadala sa dapit, niingon nga pipila lang ka tour guide ang mohimo og safety briefing sa mga bisita.
Daghan sa mga tour guide ang di awtorisado ug accredited sa LGU ug PDRRMO.
Dugang ni Chiong, imbes ang tour guide ang maayong ehemplo ngadto sa mga guest, nakita nila nga sagad kanila way personal protective equipment, sama sa helmet.
Wa sab matakda ang edad sa mga makaapil sa canyoneering kay duna silay nakit-an nga 5-anyos nga bata ug senior citizen nga gipaapil sa extreme adventure.
Wa say naka-standby nga emergency o medical responder sa dapit.
Gawas sa kwestiyonableng paagi sa pagpahigayon sa kalihukan, nakita usab sa PDRRMO ang pipila ka mga liki sa dapit ug mga kahulugon nga kahoy, nga posibleng magdala og risgo sa kinabuhi sa mga turista.
Matod ni Chiong, makig-alayon sila sa MGB aron pagsusi sa kaluwas sa lugar nga iyang gihulagway nga risgo kon dunay mahitabo nga linog o pagtay-og.