TUNGOD sa kahadlok sa mahimong pamalaud unya ni President-elect Rodrigo batok sa mga tawo nga nalambigit sa iligal nga drugas, nisurender ang giingong top 1 drug personality sa dakbayan sa Mandaue mga alas 9:30 niadtong Miyerkules sa gabii.
Ang pagsurender Pablito “Pablo” Loberanis, 29, sa Sitio Dasko, Brgy. Paknaan nahitabo atol sa pagbisita ni Duterte sa Sugbo alang sa iyang thanksgiving party dinhi sa Sugbo.
Gawas sa upat ka pakete nga shabu, iya usab nga gisurender ang iyang high-powered nga AR-15 cal. 9mm paltik rifle sa kapulisan nga may 60 ka mga bala.
Uban nga misurender ni Loberanes ang iyang 27 anyos nga live-in partner ug walo ka buwan nga anak nga lalake.
Matod ni SSupt. Jonathan Cabal, hepe sa Mandaue City Police Office (MCPO) sa mga tigbalita nga makadispatsar og di mominos duha2 hangtod tulo ka bulto sa shabu nga igo maka-supply sa tibuok dakbayan ang suspek.
Apan kini gihimakak sa suspek kinsa nagkanayon nga ginagmay ang iyang transaksyon ug sayop ang mga taho nga dinagko nga iyang transaksyon.
“We’re lucky enough na isa sa ating mga suspek si Pablo turned himself up and surrendered peacefully. Ang sabi niya, he will turn a new page in his life, magbago daw siya,” matod ni Cabal sa mga tigbalita.
Gidayeg usab ni Cabal ang pagsurender ni Loberanis ug kini mihangyo usab sa ubang mga drug personality sa dakbayan nga sundon ang gibuhat niini.
Bahad ni Cabal nga nganlan sa iyang buhatan ang mga personalidad nga nalambigit sa drugas sa dakbayan ug magbutang usab silag mga poster nga may hulagway niini.
Ilang tagsa-tagsaon sa pag-adto ang mga drug personalities sa pag-undang na sa ilang panginabuhi ug bisyo sa di pa kini niya buhaton.
Dugang niya nga si Loberanis nasikop na kanhi sa dakbayan sa Sugbo sa milabayng buwan tungod gihapon sa drugas apan nakagawas ra gihapon.
Gawas sa kalapasan Dangerous Drugs Act ang kasong atubangon ni Loberanis, mag-atubang usab siyag kasong illegal possession of firearms ug paglapas sa Comelec Gun Ban.