TUNGOD sa padayong pag-uwan sa Sugbo, dunay nakitang kalambuan ang Metropolitan Cebu Water District (MCWD) sa duha sa surface water source niini.
Gipahibawo sa maong ahensiya nga sulod ning semanaha dili lang ang Jaclupan dam sa dakbayan sa Talisay ang nakitaan og paglambo sa gidaghanon sa tubig apan lakip na usab ang Buhisan Dam.
Si Charmaine Rodriguez-Kara, tigpamaba sa MCWD, nagkanayon nga niadtong buwan sa Mayo hangtod sa unang semana sa buwan sa Hunyo ang Buhisan dam ni-average lang og 500 cubic metes matag adlaw apan ning semanaha duna kini kalambuan kay misaka na ang volume niini sa 1,900 cubic meters.
Gipasabot sa ahensiya nga mataodtaoran pa una mobalik sa iyang normal production kon magpadayon ang pag-uwan sa tungang-tungang bahin sa buwan sa Hulyo.
Nanghinaot ug nag-ampo ang MCWD nga magpadayon ang volume sa rainfall nga madawat ug maigo sa ilang supply sources aron hingpit na nga mabalik sa normal ang production sa ilang serive area sa Metro Cebu.