“JESUS loves me so I said NO to drugs (Nahigugma si Hesus kanako busa di ko mag-drugs.”
Mao ni ang nakasuwat sa yellow shirt ni Jay Lord, kabanay ni Jeffrey “Jaguar” Diaz, dihang siya niduaw sa haya sa giingong number 1 drug personality sa Sugbo kagahapon.
Pinusasan ug kinuyogan sa walo ka mga guwardiya sa Bureau of Jail Management and Penology (BJMP) 7, si Jay mapahiyumon samtang nagtan-aw ang iyang mga silingan kaniya.
“Hala! Gipusasan lagi na? Ayyy, mobisita diay sa lubong ni Kumander,” matod sa usa ka silingan.
Iyang gitultolan ang mga guwardiya kon diin siya nagpuyo kaniadto sa wa pa siya mabilanggo sa Cebu City Jail.
Taliwa sa nagsikit nga mga balay sa Barangay Duljo Fatima, si Jay yano rang nilakaw sa dapit ug daling naabot sa iyang balay diin siya gihangop sa iyang pamilya ug mabdos nga asawa.
Busy ang mga sakop sa iyang pamilya sa pagdala sa mga korona sa patay ug mga buwak nga dunay nakasuwat nga “condolence” apan way nakasuwat nga mga ngan kon diin gikan.
Apan mga tawo sa dapit nakahibawo nga sila nagbangutan sa kamatayon ni Jaguar, ngan ni Diaz nga mas ilado sa ilang dapit.
Naila si Jaguar nga manggihatagon sa iyang mga silingan.
Napatay siya sa mga pulis sa giingong pinusilay sa Las Piñas City sa Metro Manila niadtong Hunyo 17, unom ka adlaw human siya nagpa-interview sa usa ka sibyaanan.
Sa mao nga interview, si Jaguar nipadayag sa iyang kaandam sa pagtahan ngadto sa mga awtoridad ug gani, nagsul-ob pa siya og “Duterte” baller aron pagpadayag sa iyang pagsuporta kang incoming President Rodrigo Duterte.
Si Duterte niduaw dinhi sa Sugbo kagahapon alang sa nagkadaiyang mga kalihukan, usa niini ang thanksgiving party sa mga Sugboanon sa South Road Properties (SRP) kagabii.
Ang media gidid-an sa pagsud sa lugar ug bisan ang upat ka mga sakop sa Regional Public Safety Battalion (RPSB) nga armado og tag-as nga kalibre sa armas nagpalayo ra.
Usa ka personnel sa BJMP 7 nga di magpahingan niingon nga si Jay gitugtan nga magpabilin gikan sa alas 10 sa buntag ngadto sa alas 4 sa hapon.
“Duna may court order nga gi-release nga mobisita siya diri mao amo siyang escortan,” nagkanayon siya.
Gipangutana kon duna bay laing kabanay si Jaguar nga moduaw sa iyang haya, siya niingon nga naa ra kini sa korte.
Usa ka barangay official niingon nga si Jaguar hayan ilubong sa Calamba cemetery o kaha i-cremate.
Sa pagkakaron, ang gusto sa pamilya mao ang paghatag kanila og kalinaw ug respeto taliwa sa ilang pagbangutan. (Sun.Star Cebu)