2 ka pushers sa Danao gipatay sa 5 ka tawo; hayan nanambling: pulis

GITAN-AW sa kapulisan sa Danao City nga motibo sa pagpa­tay sa duha ka gikatahapang mga drug pusher mao ang pagtambling kun wa pagbayad sa giangkat nga shabu.

Ang hepe sa Danao City Police nga si Sr. Insp. Alejandro Batobalonos dili makaingon nga vigilante ang nagpatay sa duruha kagahapon sa kaadlawon.

Ang mga patay giila nga sila si Edsel Cantilla Mutillo, 32, minyo ug si Jose Garleto Gorre, 49, parehong residente sa dan Juan Luna, Hiway Looc, Danao City.

Base sa imbestigasyon sa kapulisan, gipamusil sa lima ka wala mailhing mga mamumuno ang duruha alas 4:20 sa kaadlawon kagahapon sa maong dapit.

Dugang ni Batobalonos nga nagtaptap ang mga mamumuno dihang namusil.

Giingon nga nag-standby ang duruha sa maong dapit ug kalit lang ningduol ang lima ka tawo sakay sa tulo ka mga motorsiklo.

Nakaangkon og nagkadaiyang samad pinusilan ang duruha hinungdan nga diha-diha nanga­matay.

Aduna’y suwat nga “Pusher ako” ang duruha diin gikompirmar usab sa hepe nga anaa kini sa ilang watchlist.

Matod ni Batobalonos nga posibleng nag-standby ang duruha sa maong sudlonon nga dapit aron maghuwat sa mamalitay sa baligya niini nga shabu.

Hinuon di dinagkuay ang ba­ligya sa maong mga pusher ug street level lang.

Di makaingon si Batobalonos nga vigilante ang nagpatay sa duruha tungod kay base sa mga nangagi nga pagpamatay sa dakbayan sa Danao ug base usab sa ilang imbestigasyon, pulos nanambling og shabu ang ninggawas nga rason.

Duna silay nadawat nga mga taho nga gisagulan og tawas ang shabu hinungdan nga nakita nila nga posibleng ang kustomer ra usab ang nagpatay sa mga pusher nga gitipi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph