TACLOBAN CITY - Blangko pa ang kapulisan sa Tacloban City kon unsa ang motibo ug kinsa ang responsable sa pagbanhig kang manlalaban Rogelio Bato ug sa 15 anyos nga tinun-an nga si Angelika Bonita.
Gibutyag ni P/Sinsp. Jessica Ortega, information officer sa Tacloban City Police Office (TCPO), nga naa sa ilang listahan sa mga drug personality si Bato.
Matod ni Ortega, naa sa level 2 sa mga high value target (HVT) sa Tacloban PNP ang abugado tungod sa paggamit ug pagprotektar sa ilegal nga drugas.
Usa sa mga sanga sa Project Double Barrel sa Philippine National Police (PNP), ang gitawag og Oplan HVT.
Sa Oplan HVT, mga tawo nga naa niini naglambigit sa dagkong mga opisyal ug mga prominenteng personalidad nga nalambigit sa ilegal nga drugas.
“Nasa level 2 high value target sa City (Tacloban) si Atty. Bato dahil isa siya sa mga prominente na involve sa using and protecting illegal drugs,” matod ni Ortega sa Superbalita Cebu.
Si Bato uban sa 15 anyos nga dalagita nangamatay sa ambush mga alas 2 sa hapon niadtong Martes samtang magpaingon sa usa ka mall ning dakbayan.
Ang lugar nga nahitaboan mingaw ug gituohang duha ka mga armas ang gigamit base sa nakuhang mga kabhang sa kalibre .45 nga pistola ug M16 armalite rifle.
Ilado si Bato nga abogado ni Albuera Leyte Mayor Rolando Espinosa Sr. ug anak nga si Kerwin.
Giingong abogado usab kini sa mga tawo ni Espinosa nga nalambigit sa drugas.
Ang balay ni Mayor Espinosa nakuhaan og 11 ka kilo nga shabu sa raid sa kapulisan.
Lakip sa nakuha ang mga gamit sa paggama og bomba. Atol sa ronda, napatay sa kapulisan ang unom ka armadong mga tawo nga giingong mga gun-for-hire nga ginsakpan sa mayor.
Si Espinosa nanghimakak nga ila ang drugs ug mga tawo nga napatay.
Si Ortega nahinabi sa Superbalita Cebu atol sa pagpahigayon og lecture bahin sa ilegal nga drugas.
Usa sa ningtambong niini ang nagpailang ig-agaw sa asawa ni Bato diin gisulti sa ig-agaw nga buwag sila si Bato ug asawa niini.
Sa report sa Bombo Radyo Tacloban, nasayran nga dunay relasyon sila si Bato ug ang 15 anyos.
Gani si Albuera Police chief Jovie Espenido nisugilon nga daghan og nakarelasyon nga bata si Bato.
Taliwa sa hitabo, nanawagan si Tacloban City Mayor Cristina Romualdez sa kapulisan nga mohimo og lawom nga imbestigasyon. Gisuwayan og kuha og habig ning mantalaan si Mayor Espinosa apan wala kini sa iyang opisina.