Oplan Tokhang hingusgan bisan 71 mil na ang mga nangsurender

POLICE Regional Office 7 gimandoan sa Camp Crame sa pagdoble sa ilang kampanya sa Oplan Tokhang bisan kon nasulod sila sa top 5 lukop nasud sa labing daghang drug personalities nga nitahan sa ilang kaugalingon.

Wa makasugat og problema ang PRO-7 sa gihimong re-evaluation sa National Operation Center nga gipangulohan ni Chief Supt. Nestor Bergonia kalabot sa Oplan Tokhang.

Dunay pipila ka mga numero ang wa motugma sa record sa Camp Crame apan na korehian ra dayon ug nitakdo na sa ilang listahan sa PRO 7.

Matod ni chief Supt. Noli Taliño nga usa ang PRO 7 sa mga top performing police office lukop nasud tungod sa kadaghan sa mga ningtahan nga drug personalities diin miabot na sa 71,000 ka mga tawo.

Apan modoble pa sila karon kay maoy mando sa hepe sa kapulisan lukop nasud, Director General Ronald “Bato” Dela Rosa aron ilang makab-ot ang deadline nga unom ka buwan nga masulbad ang problema sa illegal nga drugas.

Mahimong matangtang sa pwesto kadtong mga police station chief nga wa mopakita og labok sa kampanya batok sa illegal nga drugas.

“Sa mga police station may mga police tayo na medyo matamlay nga yung kanilang,” matod Taliño.

Samtang gikompermar usab ni Taliño nga ang mga kaso sa patay nga gipaubos pa sa imbestigasyon kon kinsa ang naghimo naglambigit sa mga durugista lang usab.

Uuyon siya sa panawagan ni Dela Rosa sa mga drug pusher nga sila na ang mopatay sa mga drug lord tungod kay sila ra ang gibiktima niini.

“Birahin na nila, magpatayan na dapat sila,” kini ang pamahayag ni Taliño.

Apan si Sr. Supt. Jose Doria, director sa Cebu City Police Office, wala mosanong niining maong panawagan sanglit ang pulis lang matod pa niya ang dunay katungod sa pagdakop sa mga nalambigit sa illegal nga drugas.

“Bawal yan dapat ang police ang magsagawa ng anti drug operation. Ngunit ang nangyayari ngayon sa mga patayan ay ang gumagawa yung mga drug personalities na rin,” matod ni Doria.

Naaktuhan

Samtang usa ka inahan gitanggong sa Talisay Police Station human masakpi nga nag-ihap pa sa marijuana nga iyang ibaligya suds a iyang balay sa sitio Mananga 1, Barangay Tabunok, Talisay City kagahapon sa ala una sa kaadlawon.

Ang suspek giilang si Karen Mahilum, 26, adunay live-in partner, adunay upat ka mga anak.

Ang kapulisan sa Talisay pina­ngulohan ni Supt. Aileen Recla nagpatrolya sa nahisgutang lugar aron sa pagpaniid sa mga ilegal nga kalihukan.

Ilang nakit-an si Mahilum nga nag-ihap pa sa mga linikit nga marijuana hinungdan nga dali kining gidakop.

Si Mahilum nga nakalitan sa pagdakop kaniya niingon nga wala siya makabantay sa presensya sa mga pulis sa ilang lugar.

Nakuha gikan kaniya ang 35 ka linukot nga marijuana.

Iyang gibutyag nga tag P8 matag usa ka linikit sa marijuana ang iyang baligya.

Daling gidala sa Talisay City Police Station si Mahilum samtang kagahapon gipasakaan na kinig tukmang kaso.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph