ARON mas dali ang proseso sa gusto manimpad sa laing nasod, usa ka one-stop-shop ang ablihan karong Septiyembre 5 sa SM City Cebu sa dakbayan sa Sugbo.
Kini langkuban sa mga buhatan sa gobyerno sama sa Philippine Overseas Employment Administration (POEA), Overseas Workers Welfare Administration (Owwa), Department of Foreign Affairs (DFA), Bureau of Immigration, Professional Regulations Commission, Pag-IBIG Fund, Social Security System, Phihealth, National Bureau of Investigation (NBI), Philippine Statistics Authority, Maritime Industry Authority ug Technical Education and Skills Development Authority (Tesda).
Usa kini sa lakang sa administrasyon ni Presidente Rodrigo Duterte aron mamahimong mas dali ang pagkuha sa mga gikinahanglan nga papeles sa mga nagkadaiyang ahensiya.
Aron usab matabangan kadtong gusto manarbaho sa laing nasod, gilusad usab sa Duterte Compañero Cayetano Tabang Volunteers (DCCTV) ang E-to-EDA kon ang “Education to Employment and Deployment Abroad.”
Kini aron pagtabang nga makatrabaho ang mga Sugboanon sa nasod susama sa Dubai, Qatar, Kingdom of Saudi Arabia, Japan ug Germany.
Si Dr. Nerito Martinez, national coordinator sa DCCTV, niingon nga pinaagi sa Al Hebeshi International Services, matabangan ang gusto manrabaho nga wala’y gasto.
Dugang ni Martinez nga motabang ang maong kompanya sa pagproseso sa paglarga ingon man ang paghan-ay sa kontrata niini.
Hinuon, giklaro niini nga ang aplikante mao ang kinahanglan mogasto ug mokuha sa ilang passport sa DFA ug clearance alang abroad sa NBI.
Ang Tesda sa ilang bahin mao ang mobansaybansay sa mga aplikante sa libre nga basic Japanese ug German alang sa manrabaho sa Japan ug Germany.
Samtang, ang POEA ug Owwa mao ang mohimo sa lima ka adlaw nga orientation nga seminar sa Manila.