GIMANDOAN ni Cebu City Mayor Tomas Osmeña sila si kanhi Mayor Michael Rama ug mga sakop sa Local School Board (LSB) sa paghusay sa P81.6 milyones nga nga gi-disallowed sa Commission on Audit (COA).
Ang maong kantidad nagrepresentar sa Cost of Living Allowance (Cola) sa kapin o kulang 5,000 ka mga magtutudlo sa Department of Education sa dakbayan sa Sugbo ingon man hardship ug clothing allowance gikan niadtong Enero 15 hangtod Disyembre sa miaging tuig.
Niadtong Agusto 3, ang COA pinaagi kang Maria Daisy Bercede, audit team leader, nga giaprobahan ni Cymbaline Celia Chiong-Uy, ang state supervising auditor nibutyag nga irregular kun walay basehanan ang paghatag sa City Government gamit ang kwarta sa LSB.
“The legal basis presented by the City in paying the cited allowances is without merit,” matod sa observation report sa COA human ilang nadawat ang pagpasabot sa City Hall bahin sa paghatag sa maong kantidad niadtong Marso 28, 2016.
Ilang gibasehan ang Republic Act No. 4670 kun The Magna Carta for Public School Teachers diin nalatid ang sa section 18 ang Cola, section 19 ang Special Hardship Allowances ug Republic Act No. 7160 kun Local Government Code of 1991 particular sa section 458 (a)(I)(xi), section 100 (b)(c) ug ang Presidential Decree No. 1969.
Gisuwayan og kuha sa iyang reaction si Rama apan gipasa niya ngadto kang Atty. Mark Salomon, kanhi City accountant.
Si Salomon nibutyag nga ilang huwaton ang memorandum nga moabot sa iyang law office una pa siya mokomentaryo.
Si kanhi Cebu City DepEd Supt. Dr. Rhea Mar Angtud, kinsa mao na karon ang nagdala sa DepEd sa lalawigan sa Sugbo, wala pa makatubag sa iyang habig sanglit way motubag sa iyang cellphone dihang gisuwayan og tawag sa Superbalita Cebu.
Matod ni Osmeña nga kon di niya aksyonan ang findings sa COA, mahimo siyang manubag.
“They have to solve that problem. That’s not my problem. I will not pay for them. We are issuing memo. They have to settle. If they will not settle, I will be responsible,” matod sa mayor.