DUNAY nabantayan nga kakuwang sa partisipasyon sa pipila ka mga kawani sa Talisay City Hall.
Mao kini ang nabantayan ni Mayor Eduardo Gullas sa gipahigayon nga earthquake drill niadtong Huwebes.
Ang kalihukan dungan usab nga gipahigayon sa tibuok dakbayan sa Talisay, gikan sa mga pampubliko, pribadong tunghaan ug mga nagkadaiyang establisemento.
Si Gullas niingon nga posibleng dili perpikto ang ilang gihimo apan alang sa mayor nga mas maayong himuon kini sa matag karon ug unya.
Kini aron kon adunay katalagman sama sa linog, silang mga kawani sa gobiyerno mahibawo na kon unsa ang ilang buhaton aron minos ang maangol o makalas.
Matod ni Gullas nga iyang namatikdan nga ang ubang mga kawani di seryuso sa ilang gihimo tungod kay sa dihang untop alas 9 sa buntag ug nibagting agig timaan nga adunay linog, ang ubang mga kawani wa motago ilawom sa mga lamesa nga daw way nahitabo.
Sa dihang nanggawas, migawas ang uban nga wa magtabon sa ilang ulo gamit ang ilang mga kamot.
Kinahanglan nga aduna gyoy mangulo kanila.
Si Alvin Santillana, pangulo sa City Disaster Risk Reduction Management Office, niingon nga naigo sa oras ang ilang gihimo tungod kay sulod lang sa 4 minutos nakagawas ang mga kawani.
Hinuon nagplano si Santillana nga sa sunod nilang drill, ilang ilhon ang ubang agianan sa city hall nga agian sa ubang mga kawani ug di kay mo-focus lang sa duha ka mga exit nga moresulta sa maghuot sa paggawas.
Samtang si Talisay Fire Marshall Chief Insp. Randy Mendaros niingon nga matag quarter kini nilang buhaton.
Ilang nakita nga hapit na ma-perfect sa mga kawani ang angay nilang buhaton.
Nidugang si Santillana nga sa sunod nilang earthquake drill, aduna na unya silay mga scenario nga buhaton sama sa kon adunay maangol o ba kaha atol sa linog aduna usay sunog nga mahitabo ug unsay angay nilang buhaton.