Enforcer sa Lapu-Lapu gipusil patay sa 2 ka tawo nga nagmotor

USA ka 37-anyos nga enforcer sa dakbayan sa Lapu-Lapu gipusil patay sa duha ka wa pa mail­hing mga lalake nga nag-angkasay sa motorsiklo samtang nagbantay sa trapiko sa Tamiya, Brgy. Basak mga alas 6:50 sa gabii niadtong Biyernes.

Patay diha-diha ang biktima nga si Racquel Bensi, 37, lumolupyo sa Sitio Sudtunggan, Brgy. Basak, sa dakbayan.

Matod ni PO2 Darwin Coscosin sa Homicide Section sa Lapu-Lapu City Police Office (LLCPO), nga nagbantay sa trapiko si Bensi atol sa insidente.

Giingong duha ka wa mailhing killer nga wa magsul-ob og helmet ang namusil kang Bensi.

Sumala ni Coscosin nga si Bensi naigo sa tuong bahin sa lawas nga nilapos sa walang bahin niini hinungdan sa iyang kamatayon.

Kini na ang ikaduhang higayon nga sakop sa City Traffic Management System (CTMS) sa dakbayan ang gipusil.

Niadtong Agusto 6, 2016, ang kanhi pangulo sa CTMS nga si Frank Brazil gibanhigan sa wa pa mailhing mga tawo sa dihang kini nigawas sa iyang opisina aron mopauli.

Naluwas si Brazil sa hitabo ug dugay na ki­ning nakagawas sa tambalanan.

Matod sa desk officer sa CTMS nga si Monchito Reymundo sa dihang nahinabi sa Superbalita Cebu nga human sa pagpamanhig ni Bensi, nakasinati og grabeng kahuot sa trapiko ang dalan sa Brgy. Basak og kapin sa usa ka oras sanglit nag­huwat pa man ang hingtungdan ug mga kawani sa Scene of the Crime O­­­peratives (SOCO) aron ma­kuha ang lawas sa biktima.

Dugang ni Reymundo nga istriktuhon si Bensi kon trapiko na ang hisgutan ilabi na sa pagdisiplina sa mga traysikol drayber sa dapit.

Nasuta usab ning mantalaan nga gisuwa­yan og pusil niadto si Bensi sa wa mailhing gunman apan wa kabuto ang armas.

Sa dihang gikuhaan og habig ang kagamha­nan sa dakbayan, gipasa­lig niini nga kontrolado na niini ang sitwasyon.

“The City of Lapu-lapu under the care of ac­ting Mayor Marcial Ycong along with acting vice-mayor Harry Don Radaza is closely coordinating the matter with the Philippine National Police through its Lapu-Lapu City Police Office. Action had already been taken right after the latest incident,” matod sa Public Information Office sa kagamhanan.

Gihimakak usab niini ang mga nigawas nga taho sa social media nga way gipabantay nga enforcer sa Basak tungod sa insidente.

“... Contrary to a social media account post, there is also no truth that enforcers in Basak had being pulled out nor are they neglecting their duties especially in that area,” dugang niini.

Enforcer gitaktak

Samtang sa dakbayan sa Mandaue, usa ka enforcer usab nga sakop sa Traffic Enforcement Agency of Mandaue (Team) ang gitaktak ni Mayor Luigi Quisumbing human kini nanapat og motorista.

“Recently, one of our bad apples in TEAM phy­sically accosted a motorist that refused to surrender their license. The motorist should have complied but there is NO justification for physical contact,” ni Quisumbing sa iyang Facebook post.

Sumala sa mayor nga usa ka kawani sa Team ang ni-report sa hitabo ngadto kang Glenn Antigua, pangu­lo sa Team kinsa maoy nitaho kaniya.