Kontrobersiya nga palitunong ekipo sa Kapitol wa pa ma-order
KONTROBERSIYAL nga light ug heavy equipment nga tinguhang paliton sa Kapitolyo, wala pa masugdi sa pag-order bisan og dugay na kining naaprubahan sa Hunta Probinsiyal.
Kini human nga wala uyoni sa Land Bank of the Philippines ang gitinguha unta nga re-extention sa ni-expire na nga loan application sa probinsiya.
Hanap pa nga maabot niining buwana ang maong mga ekipo nga tinguhang maangkon sa Kapitolyo alang sa nagkadaiyang road projects niini sa kalungsuran.
Kini human nga hangtud karon, wala pa diay order sa probinsiya.
Matod ni Provincial Budget officer, Danilo Rodas, ni-expire na ang ilang loan application sa LBP alang sa maong katuyuan.
Nisuway sila pagpangayo og ikaduhang extention alang niini apan matod pa wala na mosugot ang bangko.
Nunot niini, gitug-an ni Rodas nga gitambagan hinuon sila sa LBP nga mohimog laing application alang sa P200 milyones nga pondo nga ilang gikinahanglan alang sa pagpalit sa ekipo.
Sa pagka-karon, nag-ung-ong pa hinuon ang ilang application ug wala pa sila makadawat ug update labot niini.
Giingong modagan pa og tulo ka buwan una madesisyonan sa Monetary Board sa Bangko Sentral ng Pilipinas kon uyonan o dili ba ang laing loan application sa Kapitolyo.
Anaa sa P227 million ang approved budget for the contract alang sa pagpalit sa probinsiya sa mga ekipo ug aprubado na kini sa Hunta Probinsiyal.