GISUPAK sa mga lehitimong manindahay sa merkado publiko sa dakbayan sa Mandaue nga mobalik sa pagpaninda ang illegal vendors sa karaang merkado.
Magsilbi kining reaksiyon sa mga sakop sa legitimate vendors sa bag-ong merkado sa gihimong lihok protesta sa ka-kompetinsiya sa paninda .
Panawagan sa illegal vendors nga mobalik sila sa pagpaninda sa daan merkado human sila gipapahawa sa siyudad sa miaging semana ubos sa kamanduan ni Mayor Luigi Quisumbing.
Si Nieves Abarquez, lehitimong manindahay nagkanayon nga ang pagdagsa sa mga illegal vendor sa daan nga merkado maoy ilang gibasol nga gamay ra ang ilang halin sa ilang bag-ong merkado.
“Kon moreklamo sila (illegal vendors) nga wala na silay panginabuhian kay gipapahawa sila sa karaang merkado," matod ni Abarquez.
“Mas kami ang dunay katungod nga moreklamo kay pila nami ka tuig sige kaalkanse ug sigeg pangutang para puhonan kay wala mi halin diri,” dugang ni Abarquez.
Giuyonan sab ni Atty. Ernesto Maringuran, OIC Market Administrator nga taod-taod nang nagreklamo ang legitimate market vendors ngadto sa ilang kompetinsiya nga manindahay.
Mipadangat sab ang grupo og petisyon sa kagamhanan sa Mandaue sa pagbadlong maong illegal vendors.
Dugang ni Maringuran, usa sa problema sa bag-ong merkado nga minus ang mamalit human dili pa kasudlan og traysikol tungod sa pag-ayo ang drainage system sa dalan S.B Cabahug sa Tribunal.