2 sa 6 ra ang gikiha og attempted kidnapping | SunStar

2 sa 6 ra ang gikiha og attempted kidnapping

Time to read
1 minute
Read so far

2 sa 6 ra ang gikiha og attempted kidnapping

Monday, March 20, 2017

Gidala. Mga suspek sa giingong suway nga pagpanagit sa mga tinun-an sa lungsod sa Minglanilla gipusasan nga gidala sa Cebu Provincial Prosecutor's Office kagahapon. (Allan Defensor)

DUHA sa unom ka mga suspek gipasakaan na sa Minglanilla police og reklamong attempted kidnapping human madakpi sa miaging semana human giingong suway nga nidagit ug mga tinun-an sa Minglanilla Central School.

Ang mga dinakpan nga mga ahente og libro, gipadalhan og abogado sa ilang kompaniya aron pagtabang kanila.

Ang kapulisan sa lungsod sa Minglanilla uban sa mga ginikanan ug sa mga bata nga giingong gisuwayan sa pagdagit nisang-at og reklamong attempted kidnapping ngadto sa Provincial Prosecutor’s Office batok sa mga suspek nga silang James Kevie Paradela ug Rheamay Sagmon.

Wa na ilakip sa piskal ang mga suspek nga sila si Estela Montes, Marian Serenio, Reymart Abobo ug Federico dela Cruz.

Ang upat gibuhian.

Ang unom gipasanginlan nga nipasakay sa mga bata sa ilang sakyanan nga usa ka L-300 van niadtong Huwebes.

Upat ka mga ginikanan ang ningdangop sa Minglanilla Police station labot niini niadtong Biyernes sa buntag.

Usa sa mga inahan niingon nga di niya madawat nga gipasakay sa maong mga tawo sa ilang sakyanan ang iyang anak ug nangangkon lang paghuman nga “joke” o binoang ang ilang gibuhat.

Matod niya, gikuyawan siya a­lang sa kaluwasan sa iyang anak ug uban pang bata sa ilang dapit.

Ang kompaniya nga maoy gi-alagaran sa unom ka mga ahente nipadala kanila sa abogado nga si Vincent Isles aron maoy manalipod kanila. Gustong ipahibalo sa kompaniya nga lehitimo nila nga mga ahenente ang mga gitudlo nga suspek ug wala kini nanagit ug wala sab kini suway nga nanagit ug mga bata.

Nagdumili na pagduso ug counter affidavit ang mga dinakpan ug gusto nalang nila nga resolbahon na sa piskaliya ang reklamo.

Matod ni Atty. Isles nga huyang ang mga ebidensiya batok sa mga dinakpan ug dili sab kini ma-relate ngadto sa child abuse kay wala man nila hilabti o amung-amongi ang mga bata.

Panawagan ni Isles sa publiko, ilabi na sa taga-Minglanilla, nga dili hukman dayon ang iyang mga kliyente ug deretsuon pagpasangil nga nangidnap og mga bata.

Gipatik sa mantalaang Superbalita Cebu Marso 21, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments