Bug-at nga silot giduso | SunStar

Bug-at nga silot giduso

Time to read
less than
1 minute
Read so far

Bug-at nga silot giduso

Monday, March 20, 2017

GIREKOMENDAR sa Philippine Drug Enforcement Agency (PDEA) sa Central Visayas kang Gobernador Hilario Davide III ang pagpahamtang og mas bug-at nga silot sa mga bilanggo sa Cebu Provincial Detention and Rehabilitation Center nga masakpang magpalusot og mga kontrabando sama sa cellphones.

Usa kini sa mga rekomendasyon sa PDEA 7 sa giduso nga post operation report sa gobernador.

Nakita ni PDEA 7 Director Yogi Ruiz ang panginahanglanon sa pagpatuman og higpit nga mga polisiya sa pag­hupot og mobile phones sa mga bilanggo, dalaw ug staff sa CPDRC.

Ang report nagkanayon nga ang pagpalusot sa mga mobile phone nakakomplikado sa sitwasyon labi na ang mga bilanggo mogamit niini alang sa illegal nga mga transaksyon sa gidili nga drugas.

Apil sa rekomendasyon sa anti-drug agency ang makuti nga screening sa pagdawat og mga dalaw ug ang pagpahigayon og regular nga drug testing sa mga empleyado nga nadestino sa provincial jail, apil ang kinalit nga drug test alang sa mga priso.

Girekomendar usab sa PDEA 7 ang pag-isyu og commendation sa mga kawani nga niapil sa ronda aron pag-ila sa ilang nabuhat.

Ang report sa PDEA nadawat sa buhatan ni Davide niadtong Marso 10 pipila ka adlaw human gipahigayon ang greyhound operation sa CPDRC.

Sa ronda uban sa mga pulis ug sundawo nasakmit ang drugas, mobile phone ug lainlaing klase sa hinagiban, laptop, drug paraphernalia, ug Ipad.

Gipatik sa mantalaang Superbalita Cebu Marso 21, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments