Shabu gituohang diri sa Cebu gigama; basa pa dihang naabtan sa PDEA 7 | SunStar

Shabu gituohang diri sa Cebu gigama; basa pa dihang naabtan sa PDEA 7

Time to read
1 minute
Read so far

Shabu gituohang diri sa Cebu gigama; basa pa dihang naabtan sa PDEA 7

Monday, March 20, 2017

Shabu sa Sugbo? Si Philippine Drug Enforcement Agency (PDEA) 7 Director Yogi Felimon Ruiz mipresentar sa ilang nasakmit nga shabu nga balor og P6.3 milyunes ug mga armas ug uban pang mga ebidensya nga ilang nasakmit gikan nila ni Roy Estrera ug Erwin Anthony Abellan sa buy bust sa usa ka pension house sa Katipunan st., Brgy. Labangon, dakbayan sa Sugbo niadtong Dominggo sa gabii. Wa isalikway ni Ruiz nga dinhi ra gihimo sa Sugbo ang shabu kay basa pa kini ug gipauga gamit ang computer printer isip dryer. (Alan Tangcawan)

KAPIN sa usa ka kilong shabu nga posibling dinhi lang giluto sa Sugbu,nasakmit sa Philippine Drug Enforcement Agency (PDEA 7) niadtong Dominggo sa alas 6:20 sa gabii sulod sa usa ka pension house sa Katipunan st., Labangon, dakbayan sa Sugbo.

Basa pa ang shabu dihang nasakmit mga agent hinungdan nga posibleng way isalikway nga dinhi ra kini gihimo.

Nasikop sila si Roy Estrera, 38, taga Englis V Rama, Bara­ngay Guadalupe, dakbayan sa Sugbo; ug kaubang si Erwin Anthony Abellana, 40, usa ka mekaniko, taga Kawayan Brgy. Sambag 2 ning dakbayan.

Nakuha gikan sa ilang possession ang 1.6 kilo nga shabu nga mobalor sa P6.3 milyon, duha ka KG9 sub-machine pistol, daghang mga bala ug kalibre .45 nga pistola ug mga bala niini.

Apil sa nasakmit ang printer nga gihimong improvised dryer, rifle grenade, drug parapernallia, digital nga timbangan, ug boodle buy bust money nga P15,000.

Gibutyag ni Ruiz nga niadtong Nobiyembre 3 sa miaging tuig, ilang gi-monitor si Bucog human nakasibat sa operation.

Gipadayag niya nga armado ug kuyaw ang grupo nila ni Bucog, nga armado og tag-as nga mga armas.

Si Ruiz nipadayag nga ang mga dinakpan andam moabag kanila aron masubay pa ang ubang mga sakop sa sindikato niini.

Si Estrera, nga nahinabi sa Superbalita Cebu nipadayag nga sobrana sa ka 20 kahigayon siyang gisugo ni Bucog sa pag-transact sa drugas.

Ang kawad-on maoy nagkabig kaniya sa pagpamaligyag drugas diin dagko sab ang suhol nga iyang madawat.

Subay niini, si Ruiz nipadayag nga gisubay sab nila ang involvement sa grupo sa ubang kremin ilabi na ang ilang pagtiner sa tag-as nga armas.

Wa niya isalikway nga dinhi ra sa Sugbo gigama ang shabu tungod kay basa pa kini ug gipauga gamit ang improvised dryer.

Gipatik sa mantalaang Superbalita Cebu Marso 21, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments