DRUG den sa barangay Tejero sa syudad sa Sugbo gironda sa Philippine Drug Enforcement Agency-7 atol sa buy bust operation diin P1.4 Million nga balor sa ilegal nga drugas nasakmit samtang 6 usab ka mga tawo nadakpan lakip na ang target niini.
Pasado alas sais sa milabayang gabii nasigpatan ang presensya ni Kirson Rubio sa sitio Sampaguita, barangay Tejero nga namaligya sa illegal nga drugas nga maoy hinungdan nga milusad dayon sila sa buy bust.
Matod ni Leia Albiar, information officer sa PDEA-7, nga taod-taod na nilang gipanid-an ang illegal nga negosyo ni Rubio sa maong barangay.
Lakip sa nasikop ang laing lima ka lalake nga matod pa naatlan nga naghingos sulod sa drug den nga silang Arnulfo Cadungog Jr., pag-umangkon sa kapitan sa maong barangay, Rene Brocat, 37, usa ka driver nga taga Camoboan, Tabogon Cebu, Pel Roda Rosillosa, 33, panday taga Mahogany, Langub, Lapu-lapu City, Joseph Cuizon, 34 taga MJ. Cuenco Avenue, Cebu City ug Avelino Sacopaso Jr., 31, samtang nakaikyas si Anton Regis.
Mga binulto sa illegal nga drugas nga motimbang og 400 gramos ang nasakmit sa PDEA lakip na ang usa ka granada nga iya ni Rubio.
Apan hugot nga gihimakak ni Rubio nga iyaha ang illegal nga drugas nga nasakmit sud sa ilang balay.
Matod niya igo ra siya nga mogamit apan wala siya mamaligya nga una nang gipasangil ngadto kaniya.
“Dili na akoa sir, uy. Mogamit ko pero grabe dili na akoa uy,” matod ni Kirson Rubio.
Apan nalakip siya sa high value target sa PDEA-7 diin makabaligya kini ug 500 gramos matag semana.
Laing drug pusher sa barangay Alang-alang, dakbayan sa Mandaue, ang nasikop gahapon sa tungang gabii.
Siya giila nga si Romel Mencera, 33, aircon technician apan nag-sideline sa pagpamaligya sa illegal nga drugas. Matod sa dinakpan nga niundang na unta siya sa pagpamaligya apan gihulga siya sa iyang supplier nga patyon nga hinungdan nga mibalik nalang siya sa illegal nga negosyo.
“Niundang na man ko ani sir pero gihatdan man kog balik, nahadlok napud ko kay dili naman ka kaundang ani sir kung makasulod naka, patyon man ka nila,” matod ni Mencera.